Recreación 3D dun petróglifo do Val Miñor
Escanear a un nivel de micras o importante legado de arte rupestre que existe no Val Miñor, e a partir destes datos, crear reproducións exactas dos mesmos en xeopolímeros e cerámicas de arxila cocida. E todo isto sen tocar sequera estas delicadas pezas. A iniciativa, pioneira no noso país, xorde como unha colaboración entre o Instituto de Estudos Miñoranos, o Instituto de Cerámica de Galicia (ICG) e mais a Fundación Instituto Tecnológico de Materiales de Asturias (ITMA), e conta co apoio do Plan Galego de Investigación, Desenvolvemento e Innovación tecnolóxica, que cubrirá un 70% dos custes da iniciativa. Nace un novo camiño para a conservación e o estudo dos petróglifos no noso país, que agarda estar rematado antes de fin de ano. A idea a medio prazo é ampliar esta iniciativa a outros conxuntos rupestres do noso país.
