Desde hoxe está dispoñible a nova Mediateca do Consello da Cultura Galega, o primeiro paso do novo redeseño do web institucional. A nova Mediateca créase como almacén e repositorio do coñecemento que xenera a institución, a través das súas múltiples accións: desde publicacións, documentos e informes ata a dixitalización dos numerosos eventos (conferencias e debates) sobre os grandes temas da cultura galega e universal. Máis de 110 audios, 329 publicacións, vÃdeos e fichas de máis de 400 expertos son o punto de partida para a nova Mediateca do CCG.
De publicación a aplicación
Este gran cambio é a resposta a un novo concepto cultural: o incremento dos tempos de lectura e percepción de contidos en pantalla por parte dos usuarios, que nos últimos anos incrementouse sen cesar. A Mediateca refúndase para converterse nunha base de datos accesible desde calquera dispositivo, na que se poden consultar un gran número de referencias, que funciona como aplicación de apoio ao coñecemento e a toma de decisións.
Os novos libros electrónicos, pero tamén a portabilidade dos formatos multimedia, permiten aos usuarios acceder en calquera punto e con calquera dispositivo aos contidos. Ademáis, o deseño enfatiza o que a nova Mediateca considera importante: as áreas temáticas, por riba dos formatos nos que estea o contido final. Os usuarios poden recuperar a produción do CCG a partir de etiquetas temáticas e o sistema devolve publicacións, eventos, ou outro tipo de materiais.
Algo de historia (recente)
No ano 1998 o Consello da Cultura Galega iniciou o seu sitio web. No ano 2000 deu un paso decisivo: permitir o libre acceso e descarga ao inxente material de publicacións da institución. No ano 2002 o CCG decidiu incorporar tamén o seu catálogo ao nacente servizo Google Books. E no 2005 refundou o seu catálogo editorial para comezar a incorporar os primeiros contidos audiovisuais. A nova Mediateca é un paso adiante no proceso de creación de servizos culturais para os cidadáns que está a establecer o CCG.