Piruetas artísticas

Era a presentación oficial de Mercedes Suárez (Agualada, A Coruña) como directora do Centro Coreográfico Galego. Coñecida bailarina e coreógrafa galega, cunha ampla traxectoria ás súas costas, non dubidou en afirmar que as súas preocupacións sobre a danza (a formación e o público) serán claves para a nova etapa do centro. Con independencia de se resolva favorablemente a construción da sede ou non, o seu proxecto para por estabilizar a situación laboral dos bailaríns que se integarán nun corpo de baile ao que entrarán por audicións.

“A danza non é teatro, e un bailarín non pode estar meses sen ensaiar agardando por unha audición. Parécese, se se permiten as comparacións, moito máis ao traballo constante dun músico” afirma Mercedes Suárez. Por iso, nada máis aterrar no Centro Coreográfico Galego (o consello de dirección elixiuna o pasado 5 de agosto) estivo incidindo na necesidade de contar cun corpo de bailaríns estables. “Sei que por cuestións legais, os bailaríns teñen que estar dous meses sen contrato, pero conseguiremos unha estabilidade laboral moi necesaria” insistiu ao tempo que deixou ben claro a súa postura “son máis importantes que un coreógrafo, que o músico, que un deseñador de vestiario… temos que sacalos do buraco no que están metidos e dignificar a súa actividade”. Por iso, o seu proxecto no Centro Coreográfico Galego comezará a plasmarse en xaneiro, cando se faga a primeira das audicións que darán forma ao corpo de baile. Un equipo (de número aínda sen precisar e que dependerá do limitado orzamento do que se disporá) que sustentará dúas producións propias anuais para o que se contará con coreógrafos convidados. Mercedes apunta que “despois de facer Etheria, vou deixar pasar un tempo antes de poñerme a facer outra coreografía, agora é o momento de dar paso a outros profesionais para formar e enriquecer o traballo”.

A formación
Unha das constantes da traxectoria de Mercedes Suárez é a formación. Por iso, o seu proxecto á fronte do Centro Coreográfico Galego incidirá moito nesta materia. “O Centro contará cunha escola de formación para maiores de quince anos que poderán audicionar despois ás convocatorias; e tamén se poderá tomar clase alí”. Ademais, a presenza de coreógrafos estranxeiros daría pé a cursos de formación complementarios aos ensaios habituais, ao tempo que iniciarán proxectos de colaboración con escolas e conservatorios. Nese sentido, Suárez tamén apunta que “aínda que é competencia de Educación e non de Cultura, deberían repensarse os estudos de grado” (agora mesmo, existe un conservatorio de grado medio de danza en Lugo; cidade na que non existe tradición algunha de danza, máis próxima a cidades como Vigo e A Coruña). Ademais, tamén aclara que “non existe danza autodidacta”.

A medio camiño entre programa formativo e divulgador da danza. Mercedes Suárez tamén apuntaba que en breve se iniciará unha colaboración coas escolas e conservatorios que pretende que os rapaces de cada centro se impliquen na realización dun Crebanoces. “Consistiría en facer audicións por diferentes localidades buscando que os nenos que están a estudar danza se impliquen” apunta Suárez. Ademais, con este programa faría que os nenos “arrastrasen” aos seus pais cara os teatros e educar así na danza. A este respecto, a nova directora do Centro Coreográfico Galego apuntaba que lle gustaría ter orzamento para realizar accións destinadas a dar a coñecer esta disciplina.

A sede
“Se souberas nas condicións precarias nas que traballa a danza entenderías que a sede actual xa é un bo espazo” explicou Mercedes Suárez ao tempo que dixo que “o que máis ilusión me facía do novo proxecto era ter un teatro no mesmo espazo no que se ensaia”. En todo caso, a decisión sobre a construción da sede está en mans do Ministerio de Cultura neste momento. Na presentación da nova directora do Centro Coreográfico (na que tamén estaba o conselleiro, Roberto Varela), o director de Agadic, Juan Carlos Fasero, explicou que o 11 de agosto chegou a documentación da cesión da parcela do Concello da Coruña nos temos e requisitos que solicitara a Xunta (que durante nove meses paralizou a construción do edificio). Agora, Agadic volveu solicitar unha nova prórroga e está pendente do Ministerio coñecer se se teñen que devolver eses cartos (con intereses) ou se pode proceder a iniciar a construción da sede do Centro Coreográfico. En todo caso, a sede da entidade (sexa a nova ou a vella) estará situada na área da Coruña.