"Cando me asomei a este mundo atopei outro dentro del", asegura Concha Fontenla, directora do proxecto Factoría Compostela. A Factoría é un novo centro de arte aberto en novembro do ano pasado na zona vella de Santiago que decidiu incorporar a gastronomía como concepto dentro da proposta artística do proxecto. É o GastroLab. Un coordinador do espazo gastronómico, Miguel Gil -especialista no mundo dulce-, e chefs e creadores gastronómicos emerxentes e visitantes que se sucederán de acordo coas estacións e ao redor do produto galego. O obxectivo: mesturar arte, ciencia e gastronomía nun espacio que é experimental, de formación pero tamén aberto aos visitantes, que disporán de degustación entre as 15 e as 00 horas.
"Cando se estuda a arte contemporánea, fálase da composición, de ritmos, texturas, cores...", sinala Fontenla, "é obvio que a gastronomía está nesa dinámica. Cuestionar que a gastronomía é arte é como cuestionar se tamén o era no seu momento o expresionismo abstracto". Para Fontenla, o Gastrolab "é unha exposición. Trabállase en docencia, en comunicación e degustación". Segundo o restaurador Miguel Gil, a carta será "de ingredientes", pero en función do día e da investigación cambiarán as técnicas que se lles apliquen a eses ingredientes. Combinacións como "foie de pato + Nashi + Avelá + Whisky" que poden ser presentadas de xeito diferente, con proporcións, facturas e procesos distintos. Para Fontenla, "servimos de catalizadores dunhas correntes que están sucedéndose".
