O V Festival PEDRA integra patrimonio e música en Ourense

Unha visita ás escavacións do castro de Trelle, situado entre Toén, Cartelle, Barbadás e A Merca, abre este venres 12 de setembro a quinta edición do Festival PEDRA. O "festival de saberes" que combina, arqueoloxía, patrimonio inmaterial, música e escena medra nesta xeira e reivindica "a figura do asociacionismo que programa cultura dende o rural".

O museo etnográfico de Loiro, en Barbadás, acolle as actividades da primeira xornada, que inclúen un concerto comentado de músicas de raíz a cargo da Fundación Legar e outro a cargo de Neonymus. No día 13, dj Dani Tamayo abrirá a sesión, seguido dunha sesión de xogos populares e un recital a cargo de Allo Negro. Regueifa Tour, un contacontos de Uxía Morán e concertos de Lideira, Dj Triston e Vimbio a completar o programa.

O día 19, as propostas trasládanse á Fundación Trasalba de Amoeiro, onde a narración oral de Anxo Moure iniciará as actividades. Para o 20 está prevista a presentación do facsímil da revista literaria A Bisbarra, desenvolvida por veciños da zona desde 1981. O autor de banda deseñada Cristian F. Caruncho presentará o seu traballo para seguir un concerto de Cinta Adhesiva e de Ulises en Trasalba. A edición fechará cunha sesión de arqueoastronomía realizada desde o Pazo.