Realidades de mentira

Se hai alguén que pensa que O curioso caso de Benjamin Button é unha película de imaxe real, recomendamos que non siga lendo esta reportaxe. E que tampouco se achegue por calquera dos escenarios de Mundos Dixitais, o festival de infoarquitectura, animación, videoxogos e gráficos computerizados que abre hoxe as súas portas na súa Coruña.

Na edición de 2008, Mundos Dixitais asistimos a presentación dunha sistema novo de iluminación sobre superficies que despois empregaría o director David Finch en O curioso caso de Benjamin Button. É a ferramenta que permitiu cambiar a aparencia física de Brad Pitt para que, alterando o ciclo natural da vida, nacera vello e morrera sendo un bebé. Este ano, outra especialista, Ziah Fogel explicará como é posible recrear a praza do Vaticano e enchela de xente a partir da nada (sábado 11, ás 11:30 horas). Pero isto non é máis que unha mostra do que dan de si as conferencias e presentacións de Mundos Dixitais, o encontro relacionado cos gráficos computerizados que comezou a súa andaina hai oito anos.

Un mundo animado
Os planos que recrean unha vivenda que aínda non se empezou nin a construír, as películas de animación, as recreacións de espazos públicos aplicados a proxectos didácticos, as presentacións de proxectos arquitectónicos… a recreacións virtuais e a animación está presente en moitos máis ámbitos da vida cotiá dos que somos conscientes. E iso sábeo ben Manuel Meijide, profesor da Escola Técnica Superior de Enxeñeiros de Camiños que puxo en marcha hai oito anos un encontro que se encargara de ver os avances tecnolóxicos que se encargan de facer ese traballo. Desde entón Meijide dirixe Mundos Dixitais, un encontro de carácter técnico sobre a animación dixital, os videoxogos, os efectos especiais e o deseño en tres dimensións especializado en recrear a realidade con ferramentas tecnolóxicas.

“Se alguén me pregunta se creo que O curioso caso de Benjamin Button é unha película de animación, a miña resposta sería que si” asegura un Meijide que cre que as barreiras entre os xéneros tradicionais están a caer. Nun primeiro momento, coa tecnoloxía buscábase o realismo na recreación dos obxectos, ou das paisaxes. “Pero iso xa está superado, xa se conseguiu recrear a realidade de tal xeito que non se distingue se é real ou falso, por iso, agora os espazos son os contornos nos que creamos historias, son elementos narrativos” explica Meijide. E nesa liña está Mundos Dixitais, un encontro modesto que, sen embargo, ten un programa de calidade que permite traer a figuras de primeiro nivel ata Coruña. Especialistas en crear texturas para vídeo, arquitectura dixital, crear efectos especiais… profesionais que traballan para as grandes casas de efectos especiais e de animación (Pixar, Dreamworks,….)

“Mundos Dixitais vai máis encamiñado ao sector profesional e estudantes que ao gran público, porque o noso obxectivo é fuxir do making off, é dicir, hai que explicar algo máis que o como se fixo, porque este é o foro no que moita xente vén a aprender”, explica Meijide. Todo isto converte a Mundos Dixitais sexa nun festival para un perfil técnico moi alto, con asistentes que chegan desde diferentes partes do mundo. Unha vez aquí contarán con sesións de presentacións como as que haberá na Domus. O primeiro proxector de 3D dixital de Galicia está no Museo do Home coruñés, por iso é o sitio no que Dygra presentará un avance de Noite ¿de paz?, a súa aposta para este Nadal de 2009. Alí tamén terá lugar a presentación dun dos pratos fortes do festival, a de Jeff Kleiser que falará da animación estereoscópica de gran formato. Kleiser é o responsable dos efectos especiais de películas como X-Men, Os catro fantásticos ou Scary Movie.

Outras posibilidades
Alén dese perfil técnico para asistir as conferencias, Mundos Dixitais é tamén un escaparate para os profesionais galegos, xa que é o lugar polo que se pasean as grandes empresas deste sector que veñen na procura de traballadores especializados (ou de contactos para futuros contratos). No 2008 foi a primeira vez na que se desenvolveu esta iniciativa, e o resultado foi moi bo. “El ranchito, que é unha empresa de postproducción e efectos especiais que sempre leva os premios Goya nesta categoría, estivo o ano pasado na Coruña e quedaron moi sorprendidos co nivel que aquí había, tanto foi así que acabaron contratando a xente que coñeceron aquí para os seus proxectos” explica o director de Mundos Dixitais. Por iso, no programa desta edición as xornadas de recrutamento teñen bastante presenza.

“Os retos de futuro, explica Manuel Meijide, pasan por seguir mantendo este nivel de calidade e que sigamos coñecendo novas ferramentas e aplicacións que axuden a que o mundo virtual se pareza máis ao mundo real”.