As deseñadoras noveis volven da pasarela alternativa de Cibeles moi satisfeitas pola experiencia. Deseñadoras con ego

Son novas, atrevidas e mesmo provocadoras. Os seus deseños son moi frescos e acaban de formar parte de El EGO a pasarela máis alternativa do desfile Cibeles que rematou esta fin de semana en Madrid. Unha proposta á que acudiron nove representantes galegas que chegan exultantes de ideas, proxectos e contactos. A moda máis combativa xa está aquí, pero non todo é un camiño de rosas.

Non é unha mera sucesión de deseños, atezzo e roupas, senón propostas case escénicas dunha filosofía ou, por dicilo doutro xeito, dun proxecto plasmado en tela. De feito, non é unha pasarela comercial ao uso, senón máis ben, como a propia Sara Coleman (que traballa baixo a marca 36 grados) indica, un desfile de ideas con pouca vocación comercial. Dos quince deseñadores de todo o Estado que foron convidados a participar nesta ocasión, nove eran galegas, un indicador clarísimo de que algo está a acontecer no mundo do deseño no noso país.

As propostas galegas
A delegación galega estaba formada por nove participantes, sete delas son estudantes que acaban de presentar o seu proxecto de fin de carreira na Escola Superior de Deseño Téxtil e Moda de Galicia (Esdemga), centro dependente da Universidade de Vigo que concede un título propio no sector. De feito, a maior parte das deseñadoras que participaron no showroom e na pasarela, presentaron os estilismos que formaban parte do seu proxecto de fin de carreira. Iso sí, tal e como confesan algunhas destas novas deseñadoras, tiñeron que ser ampliados xa que o proxecto só contemplaba seis e a organización de El EGO pedíalles que presentaran un mínimo de quince estilismos. Un feito que nos obrigou a traballar de xeito case vertixinoso durante mes e medio asegura Lorena Rodríguez.

Para ser seleccionada en EL EGO tes que presentar un dossier completo cun proxecto e con deseños que sirva de aval da túa calidade. Este ano, unha das organizadoras, Sofía Clarí, estivo en Pontevedra vendo o desfile organizado polas estudantes de último curso de Esdemga, gustoulle tanto o que veu que as animou a participar. Tendo en conta o número de participantes galegas, o resultado foi evidente. Menchu Mora (Santiago) e Mónica Bastón (Pontevedra) presentaron unha proposta inspirada na película de Luis Buñuel, Belle de jour; Alba Blanco achegou unha colección que representa unha atmonsfera mariña; Amai Rodríguez define a súa proposta como unha colección teatral, surrealista que achega volumen moi fortes, con grandes contraposicións, mentres que Sara Coleman arriscou coa súa fragmentación do patrón, amosando con cometas imposibles e papiroflexia que o exterior e o interior se unen nun todo.

Pero non só iso. Todo, absolutamente todo o que se ve no desfile ten que ser creación orixinal afirma Alba Blanco. Desde a música, as luces, a pantalla de atrás, a que pon o nome, todo e todo, fai o deseñador. No fondo porque así tamén garantes que a túa colección sae como ti queres, e daslle o toque ti decides asegura esta deseñadora que pretende explorar máis a liña dos contrastes, do naif versus sinistro no futuro máis inmediato.

Esforzo recompensado
Foi unha locura de traballo, explica Lorena Rodríguez, en mes e medio tes que preparar nove estilismos máis, un deseño do escenario, música, e unha posta en escena para que todo pase nuns minutos. Unha síntese das últimas semanas na que coinciden todas as deseñadoras. No que tamén concordan en que todo este esforzo compensa. Merece a pena pola experiencia, pola publicidade xa que estivo moita prensa e, sobre todo, pola oportunidade de que o teu traballo sexa coñecido apunta María Díaz.

Pero todo este traballo non é altruísta. Malia que acaban de chegar (a pasarela aínda rematou esta fin de semana) e aínda non fixeron contas, estas novas deseñadoras xa tiveron que pagar ben caro o seu soño. Darse a coñecer en EL EGO supúxolles a algunhas delas arredor duns 3.000 euros. Cartos que sufragaron dos seus propios petos, polo que afirman non lles viría mal ter algún tipo de apoio institucional. En todo caso, o optimismo destas deseñadoras desborda por todas partes. María Díaz asegura que é unha plataforma imprescindible para os que estamos a empezar neste sector e é unha sorte tremenda non ter que pagar por presentar a colección, como acontece en calquera feira e, ao tempo daste a coñecer.

De momento, todas regresan cheas de ilusión polo bo traballo realizado, polo alto nivel conseguido e porque, ademais, houbo numerosas tendas, distribuidores e fotógrafos interesados no seu traballo. Son Sara Coleman, Sarai Fernández, Menchu Mora, Lorena Rodríguez, Amai Rodríguez, Mónica Bastón, María Díaz, Paz Villar e Alba Blanco e haberá que seguírllela pista.