É un dos principais autores galegos profesionais de BD. Guioniza e debuxa unha serie propia titulada "Malas pulgadas" que se publica semanalmente na revista "Mister K" (ed. El Jueves) desde o primeiro número da mesma (outubro de 2004).
Foi monitor nas Semanas de Banda Deseñada. No verán do 2001 coordinou a mostra colectiva "Microclimas" e confundou a galería de arte Wootelo (con sé en Lugo) e mais o colectivo creativo homónimo.
Foi o responsábel da publicación do fanzine "Kedeké" a comezos dos anos noventa. Ademais, ten colaborado en publicacións galegas como "O Fanzine das Xornadas", "Ovo", "Bambán", "Golfiño" (segunda etapa) e "Semana de Banda Deseñada". A súa bedegrafía expándese por cabeceiras de renome galegas, españolas e lusas como "Bíblia", "TMEO" ou "Mono gráfico". Afincado en Barcelona, tamén contribúe aos novos proxectos de cómic galego como "BD Banda" e "Barsowia".

Palmarés
Gañador de numerosos galardóns nas convocatorias da Xunta de Galicia, tamén foi premiado polo Injuve (Ministerio de Traballo e Asuntos Sociais de España) e no II Salão da Caricatura de Vila Real (Portugal). Mereceu un accésit no IV Certame Ourense de BD (1994) por "Lar". Tamén no 94 se lle concedeu un accésit no Concurso Galego de Caricaturistas Noveis da II Bienal da Caricatura de Ourense. Mereceu un accésit no XI Concurso Galego de Banda Deseñada Xuventude 95 por "Lacazán". Concedéuselle o 3º premio no II Certame Galego de Imaxe Artística - Xuventude 2001, modalidade BD, categoría de 23 a 30 anos. Accésit na categoría de banda deseñada dos premios do INJUVE en 2003. Pola historia Microorganismo feo levou ou segundo premio da categoría A do IV Certame de Imaxe Artística 2003.

Formación específica
Licenciado en Belas Artes pola facultade de Pontevedra.

---

---

---

  Noticias relacionadas