As xornadas sobre "Arte e erotismo" que hoxe rematan no museo de Belas Artes de A Coruña, analizaron, entre outras cuestións, as relación dos artistas co xénero ou a presencia do erotismo na arte en diferentes momentos da historia.
Fotografía
Na primeira das xornadas destacou aconferencia de David Balsells sobre a sobre a fotografía erótica, na que analizou a relación dos fotógrafos co tema. Segundo el, a intervención do artista na obra vai desde o papel de voyeur ó de protagonista, cunha implicación variable. A intervención de Balsells estivo acompañada da proxección de diferentes fotografías ilustrativas.
Erotismo sacro
A presencia da sexualidade na arte sacra centra varias das intervencións que se fixeron estes días. Así, Ángel García del Olmo, investigador da iconografía sexual do románico, analizou o contido erótico de este estilo medieval e espuxo a súa tese de que a proliferación nel de imaxes de tipo sexual obedecía á intención de fomentar a natalidade. Pola súa banda, Xosé Manuel Buxán, profesor de Belas Artes de Pontevedra, realizou unha interpretación homoerótica do santoral cristián, con casos como as representacións de San Sebastián, San Xoán Bautista e San Xoán Evanxelista.
Pintura erótica
A presencia do erotismo na pintura en diferentes momento da historia ocupou a tarde da xornada do xoves. A censura que sufriu a pintura erótica renacentista durante a ilustración española, a imaxinería erótica no simbolismo ou a mirada erótica de Isaac Díaz Pardo foron os temas analizados.
