Dezaoito candidaturas con nome galego nos Premios MIN

Os Premios Min da Música Independente estatal chagaron xa á súa fase de selección final. Os votos dun xurado especializado determinaron xa os cinco mellores candidatos de cada categoría e entre eles está o nome gañador, que se coñecerá na gala de entrega desta 17ª edición do premios da industria musical independente. De entre as corenta propostas iniciais con orixe galega que se presentaron en algunha ou varias das categorías son once as que chegaron a esta fase, acumulando entre todas elas ata 18 candidaturas posibles. Resulta unha presenza moi superior á de outras edicións e moi destacable pola variedade de categorías nas que se manteñen grazas ao xurado profesional.

Na categoría de 'Mellor álbum en galego' das cinco propostas que optan ao premio polos seus traballos presentados en 2024, catro está editadas polo selo Raso Estudios: A Pedreira, por 'Basal' (Raso, 2024); Ortiga con 'Obra social' ( Raso, 2024); The Rapants, 'La máquina del buen rollo' (OFF Stage); A mulher lyrio (Raso Estudio, 2024) e Baiuca, por 'Barullo' (Raso, 2024). No caso de Baiuca o proxecto acumula ademais outras dúas candidaturas finalistas nas categorías de 'Mellor gravación de electrónica' e 'Mellor álbum do ano'. Con tres finalistas parte tamén o dúo Bala, que podería conseguir os premios a 'Mellor directo', 'Mellor disco de rock' e 'Mellor produción musical', polo seu traballo 'Besta'. Por outro lado na categoría de 'Mellor álbum de jazz' tamén está moi presente o talento galego neste xénero grazas Abe Rábade, con 'Tempo de cor' (Karonte, 2024); e Baldo Martínez, por 'Música imaginaria' (Karonte, 2024).

Dúas candidaturas finalistas acadan o dúo Caamaño & Ameixeiras, unha ao Mellor Videoclip, por ese 'Catro Cousas' rodado no Parque do Pasatempo con Rodrigo Cuervas, e outra como posible Mellor Artista Emerxente de 2024. Na categoría emerxente mantense tamén a psoibildiade para Carlos Ares, que ademais é finalista en 'Mellor álbum de pop' por 'Peregrino'. Nesa mesma categoría competirá polo premio co santiagués Carlangas, e o seu segundo disco en solitario tras da separación de Novedades Carminha, 'Bailódromo vol. 1' (Virgin records). Pecha a lista de nomes galegos o coruñés Xoel López, finalista ao premio a Mellor directo do pasado ano por Albatros (Sesiones Espíritos IX).