Xunta e RAG amosan a súa dispoñibilidade a negociar un novo acordo pola lingua galega

As celebracións destes días ao redor do Día das Letras Galegas valeron tamén para que as diferentes partes implicadas na normalización da lingua galega crucen mensaxes sobre o novo tempo político. Dunha banda, o conselleiro de Cultura, Lingua e Xuventude, José López, avanzou a vontade do goberno para "actualizar" o Plan de Normalización Lingüística e acadar un "gran consenso", xa que "os tempos evoluíron moi rápido". O conselleiro expresou o interese, por exemplo, por mellorar a presenza do galego nas novas tecnoloxías e nas redes sociais. Confía en incluír no acordo ás institucións como a Real Academia Galega, o Consello da Cultura Galega ou as universidades. Pola súa banda, Víctor Fernández Freixanes, presidente da Real Academia Galega, tamén amosou a posición da Real Academia Galega durante a súa intervención no pleno do Día das Letras Galegas, na Coruña. Freixanes chamou a "corrixir erros e abrir esperanzas" nun "gran pacto polo galego". Pediu facer "crítica e autocrítica" e "pensar no seu futuro, no seu proxecto, alén das nosas fronteiras, na súa utilidade, no seu uso e nas xeracións do futuro". Freixanes manifestou a disposición de incluír a "todas as voces, sen excluír a ninguén e quizais todos ceder algo". Para o presidente da RAG, os problemas do galego atópanse nestes momentos de xeito máis acuciante na transmisión familiar. Son mensaxes que van preparando un outono que se augura de negociación.