Un simposio reivindica a figura do filólogo Xosé Luís Pensado este 15 de marzo

Xosé Luís Pensado Tomé, falecido en Salamanca no ano 2000, foi catedrático de Filoloxía Románica e Filoloxía Galaico-Portuguesa na universidade desta cidade. Ademais, foi membro da honra da Real Academia Galega, correspondente da española e membro de honra da Academia de la Llingua Asturiana. Agora, un simposio que se celebra entre Santiago e Negreira, onde naceu este investigador en 1924, reivindica a súa figura.

Cando se compren cen anos do seu nacemento, a Secretaría Xeral de Política Lingüística, a Universidade de Santiago, o Concello de Negreira e o Centro Ramón Piñeiro organizan o Simposio Xosé Luís Pensado. 100 anos (1924-2024).

A facultade de Filoloxía da Universidade de Santiago acollerá na mañá do 15 de marzo a primeira sesión do encontro, cunha intervención sobre o traballo deste investigador na edición da obra de Frei Martín Sarmiento a cargo de Henrique Monteagudo. O labor de Pensado a reivindicar o traballo do relixioso desde os anos 60 sentou as bases da súa consideración na cultura galega posterior.

Na mesma sesión Alexandre Rodríguez abordará o período de Pensado na Universidade de Salamanca, Ramón Lorenzo fará un repaso das súas ideas sobre a gheada na nosa lingua e Xesús Alonso Montero tratará da súa importancia na constitución da lingüística galega moderna.

Durante a tarde, o encontro trasládase á Casa da Cultura de Negreira, onde X. Amancio Liñares falará sobre o centenario do autor e Xosé Luís Axeitos informará sobre a relación con Galicia que Pensado mantivo desde o seu posto na Universidade de Salamanca. A xornada rematará coa inauguración dunha placa na casa natal do homenaxeado.