Culturgal reformúlase co foco no público

O Pazo da Cultura de Pontevedra acollía este 16 de novembro a presentación da décimo sexta edición de Culturgal, primeira con Camilo Franco como director. O encontro renoméase Feira das Culturas Galegas coa intención "de recoller o carácter plural do sistema e da oferta cultural do país", segundo explicou a organización. Co foco posto no público, a iniciativa quere nesta xeira pór o foco nos públicos e medrar no seu poder de convocatoria. "As culturas precisan públicos e Culturgal quere loitar por el", sintetizou Camilo Franco na presentación.

A falar da mudanza de concepto desta cita, que se celebrará entre o 1 e o 3 de decembro no propio Pazo da Cultura, e que por vez primeira conta cunha programación expandida en Vigo, Franco sinalou que a intención é "que non sexa tanto un resumo do que pasou o ano anterior como un avance do que vai acontecer o ano seguinte, para que o público o vexa".

Un cento de actividades promovidas da organización, canda a outras cen desenvolvidas polas entidades participantes no encontro compoñen un programa que se distribuirá en cinco escenarios temáticos, centrados en Literatura, Música, Escénicas, Infantil e Arte. Estes espazos acollerán recitais, avances, proxeccións, obradoiros, presentacións ou concertos.

O director repasou algunhas das novidades de Culturgal para esta edición. A Feira das Culturas Galegas contará en 2023 con cinco escenarios: Literatura, Música, Escénicas, Infantil e Arte. Por eles veremos desfilar propostas do máis variado (recitais, avances, proxeccións, obradoiros, presentacións, concertos...) que inclúen nomes como Leilía, Bernardo Atxaga, Paula Carballeira, Yolanda Castaño, Jaione Camborda, Leilía ou a Orquestra Galega de Liberación.

Dentro das novidades desta edición está o maior peso que a organización lle outorgou á poesía e á banda deseñada. Helena de Carlos, Yolanda Castaño, María Lado, Oriana Méndez, Marga Tojo, Samuel L. París ou Dores Tembrás amosarán a actualidade da lírica galega. Pola súa banda, o ciclo Ilustrando amosará ao vivo o traballo de profesionais da banda deseñada galega como Kiko da Silva, Fran Bueno, María Bren, Edi García, Miguel Robledo ou Laura Romero.

Entre os proxectos se darán a coñecer no evento está o podcast de terror 13 Avisos, dirixido por Paula Carballeira, e o encontro poético de Iria Piñeiro e Mónica de Nut en Kennebec. Unha área de videoxogos con competicións de producións galegas e unha exposición dedicada a repasar a historia do videoxogo en Galicia fan tamén parte da oferta de 2023.

Avances de seis obras cinematográficas galegas que se estrearán o ano que vén, canda a proxeccións de Honeymoon, O Corno ou Matria. Tamén se darán a coñecer as programacións para 2024 do Centro Coreográfico e do Centro Dramático Galego.