'Carraxe' de Muriel Pernas gaña a sección galega do festival Curtas de Vilagarcía

A 51 edición de Curtas, Festival do Imaxinario de Vilagarcía de Arousa rematou este sábado presentando o seu palmarés tras 9 días de proxeccións nos que puideron verse 23 longametraxes e 95 curtas a concurso nas súas tres seccións oficiais. O filme 'Carraxe' dirixido por Muriel Pernas e protagonizado por Mabel Rivera (Goya por 'Mar adentro') e Roberto Leal, fíxose co galardón á mellor curtametraxe galega. A longametraxe española 'La mesita del comedor', de Caye Casas foi a seleccionada polo xurado para o premio absoluto da sección oficial á mellor cinta, acadando tamén os premios de interpretación para David Pareja e Estefanía de los Santos. O premio para mellor realización galega foi parar a Jorge Morais Valle pola curta de animación 'In Half'.







O certame repartiu ademais os galardóns a Mellor Película Latinoamericana que foi para longametraxe arxentina 'Juego de Brujas'. Para Arxentina foi tamén o galardón de mellor realización feminina que recaeu na directora Tamae Garateguy pola longametraxe 'Auxilio, el poder del pecado'. O premio masculino homólogo foi para Simon Öster por 'Lost in the Sky'. O Premio Roberto Camba aos mellores efectos especiais foi para a cinta 'Abruptio'. O Premio Especial do Xurado foi apara a a longametraxe chilena 'Análogos', mentres que o público decantouse para o seu premio pola estadounidense 'All you need is Blood'. A cinta británica 'Company' levou o Premio a Mellor Curtametraxe de Ficción e o de Mellor Curtametraxe de Animación foi para a alemá 'In Seiner Gnade'. Con este reparto rematou a 51 edición deste certame especializado nos xénero fantástico que cada ano vai crecendo en alcance e prestixio e reforzándose coma referencia da axenda audiovisual galega.