A Sala Malatesta de Santiago pecha definitivamente

A través das súas redes sociais a Sala Malatesta emitiu un comunicado no que, ademais de poñer en antecedentes a situación actual proporciona un relato de esgotamento ata o límite na loita por seguir coa actividade contra o que que consideran unha "persecución impulsada e avalada polo Concello de Compostela" do que consideran que recibiron un trato de "crueldade e desprezo". Malia asegurar que seguirán adiante cos procesos xudiciais abertos en defensa dos seus dereitos ante o Concello, as responsables da sala son definitivas ao anunciar que "con moito pesar, non temos outra alternativa que abandonar este proxecto". Agradecidas con público, artistas e traballadores por estes dez anos de actividade, no comunicada recalcan a perda que para a capital galega supón o peche (por segunda vez) deste espazo. "Sabemos da importancia desta Sala e somos conscientes de que estivemos ao fronte dun espazo de referencia alternativo que abarcou unha parte importante do tecido asociativo e privado de Santiago de Compostela creando unha cidade mais dinámica, xeradora de riqueza e cunha oferta cultural envexábel para calquera cidade galega", din no seu comunicado, "Hai vida mais alén dos espazos institucionalizados e altamente subvencionados. Existen outras formas tamén válidas de programar e consumir cultura para facer de Compostela, cidade universitaria, unha cidade vibrante e atractiva para a sociedade galega. Na diversidade de oferta de lugares está tamén o crecemento da Cidade e sen este espazo a cidade perde", conclúen. As vías xudiciais para aclarar este proceso seguen o seu camiño.

Ver esta publicación en Instagram

Una publicación compartida por Sala Malatesta (@salamalatesta)