Falece o antropólogo danés Gustav Henningsen. A súa investigación sobre bruxería nos anos 60 en Galicia deixou importantes fondos gráficos e sonoros de gran valor patrimonial

Gustav Henningsen en 2021 asinando a cesión de parte do seu fondo bibliográfico á Universidade Pública de Navarra

O Museo do Pobo Galego ven de expresar, a través das súas redes sociais as súas condolencias ante o falecemento do antropólogo danés Gustav Henningsen (1934-2023), cuxas investigacións en Galicia na segunda metade da década dos anos 60 deixaron abundante material, parte do cal foi cedido a esta institución. Foi en 1964 cando Henningsen se mudou á comarca de Ordes coa súa familia para facer o traballo de campo do seu doutoramento en antropoloxía. Desde alí desenvolveu, ata 1968, un intenso traballo de campo na procura das prácticas de maxia e bruxería que continuaban vivas no lugar. Gustav Henningsen era Magister artium en Folklorística Nórdica pola Universidade de Copenhague (1962) e doutor en Filosofía pola mesma universidade, coa tese doutoral The Witches' Advocate. Director de Investigación do Danish Folklore Archives entre 1965 e 2002, as súas investigacións sobre a bruxería e a Inquisición fixeron del o máximo especialista a nivel mundial nestas materias.

En Galicia a súa investigación levouno por diferentes aldeas e romarías do país, e na procura de testemuños compilou unha grande cantidade de rexistros sonoros de voces e cantares, fotografías e notas sobre os máis diversos temas. Aquel material permaneceu inédito e conservado nun museo de Dinamarca ata que, na altura de 2009, o Instituto da Lingua Galega entrou en contacto cos rexistros sonoros daquela investigación. Foi entón que os fondos de Gustav Henningsen voltaron a ter un papel na cultura do noso país. O Museo do Pobo Galego custodia na actualidade unha copia dixital das gravacións sonoras de Henningsen e mais outra dos negativos fotográficos que rexistrou en Galicia. Coa colaboración do antropólogo, o centro inauguraba na súa sede en Compostela a mostra 'Galicia máxica. Reportaxe dun mundo desaparecido' en novembro de 2015. Nos últimos anos, o material dese estudo deu pé a toda unha serie de iniciativas culturais no noso país, como recollemos en CulturaGalega.gal na nosa serie de reportaxes 'O fecundo legado Henningsen'. O traballo do danés inspirou exposicións fotográficas, libros, propostas musicais ou mesmo a obra de teatro "Relato para un incendio", que recupera dun xeito moi particular a obra deste investigador a partir do texto co que Ernesto Is conseguiu 2021 a primeira Bolsa de Dramaturxia e Creación que convocou o Centro Dramático Galego e que foi levada á escena pola compañía AAntena. A partir da obra desenvolveuse o proxecto 'A ollada de Gustav', que incluíu unha mostra coas fotografías do investigador do fondo do Museo do Pobo Galego e a recreación, por parte da Asociación Cultural Raigañas. dalgunhas das pezas musicais que recolleu este antropólogo.

🖤 Hoxe recibimos, con pesar, a nova do falecemento do antropólogo #GustavHenningsen en Dinamarca.

Henningsen (Slagesle, 1934 – Lyngby, 2023) desenvolveu unha importante parte do seu traballo en Galicia, a finais da década de 1960. pic.twitter.com/ZXQUPlJGmD
— Museo do Pobo Galego (@MuseodoPobo) October 18, 2023