Cruceiro e igrexa de Santa María da Atalaia. Fonte: Turismo de Galicia
Un investimento total de 170.000 euros permitirá restaurar a igrexa de Santa María da Atalaia, en Laxe. A Xunta licitou o proxecto de recuperación deste templo de estilo gótico mariñeiro, no que xa se está a traballar sobre o cruceiro.
Segundo sinala o Goberno, as intervencións previstas centraranse en "resolver os danos que se teñen detectado tanto na torre, como en determinados elementos escultóricos pétreos da fachada e do interior do edificio". Canda a isto, tamén se abordará a restauración do fresco de San Domingo de Guzmán existente no interior do templo.
De xeito previo a esas actuacións, están xa en marcha os traballos para recuperar o cruceiro da igrexa, no que apareceron fendas importantes, e mais unha cruz do testeiro do templo, que sufriu danos logo da súa caída. Estes labores contan cun orzamento de 5.000 euros.
