Luís Zahera, Xurxo Fernández e Lume na palleira levan os Premios Rebulir

O actor Luís Zahera, na categoría de Artes escénicas; o músico Xurxo Fernándes na de Música Galega e o programa da Radio Galega Lume na Palleira, conducido por Emilio Españadero, na categoría de Homenaxe, xa poden presumir de ser os destinatarios dos XII Premios Rebulir da Cultura Galega. Ata o vindeiro 16 de decembro, dentro do Festival Internacional Rebulir, haberá que agardar para ver aos homenaxeados recoller os galardóns que lles veñen de ser outorgados. Un xurado composto por dez persoas convocadas pola Asociación Cultural Rebulir de Ramirás (Ourense), que organiza os galardóns e o festival, ven de decidir os destinatarios destes recoñecementos dirixidos a persoas ou colectivos que contribúan á difusión e posta en valor da cultura autóctona nas súas diferentes manifestacións. As tres categorías dos premios (foron decididas por este xurado no que están presentes representantes de institucións públicas (Xunta de Galicia, deputación de Ourense e Concello de Ramirás) xunto con outros do tecido artístico, cultural e académico da provincia.

Segundo consta no comunicado sobre as motivacións do fallo dos premios, o músico Xurxo Fernándes o recibe "por representar a interculturalidade desde o eido musical e poñer en valor o propio sen deixar de conectar co alleo". O artista coruñés, coñecido coma etnógrafo e investigador da tradición popular musical oral por formar parte de Radio Cos xunto a Quique Peón, foi quen de reunir música de raíz tanto galega coma mediterránea oriental con base sefardí como demostrou no seu traballo, ensanchando as marxes da conexión cultural musical cara ao sul como demostrou no seu disco "Levaino!" (2021). O xurado atopou tamén inspiración no mundo da música para o seu premio Homenaxe a unha traxectoria, que foi para o programa da Radio Galega Lume na palleira' , conducido por Emilio Españadero. Nesta caso a acta sinala o seu valor " por ser un dos máximos expoñentes da difusión da música tradicional e da cultura de base desde fai máis de 25 anos". O mantemento "da súa esencia e raigame galega" sen renunciar a ela durante a súa dilatada traxectoria no mundo da interpretación foi o motivo que levou a xurado a ver no actor Luís Zahera merecedor do galardón na categoría de Artes escéniecas.