Membros do xurado dos Premios Xerais.
Esta fin de semana falláronse os Premios Xerais de Novela, e os xurados escolleron as obras de Pedro Feijóo, María Reimóndez e Leticia Barbadillo. Pedro Feijóo gañou o Premio Xerais de Novela coa súa obra Ninguén contará a verdade, unha novela sobre a corrupción política protagonizada por unha xornalista en paro, Marosa Vega, que en colaboración cun xornalista veterano, Salva Lamas, investiga un caso de corrupción política que afecta ao presidente da Xunta e que está a deixar un regueiro de vítimas. Segundo o xurado, é unha novela "ousada e ambiciosa cunha trama adictiva". Pola súa banda, María Reimóndez fíxose co Jules Verne 2023 de Literatura Xuvenil coa novela Furia. Nela abórdase a incursión no mundo do boxeo de Cecilia, unha rapaza de 16 anos que se muda de cidade a vivir coa súa tía avoa trala morte da súa nai. No seu traxecto vital, Cecilia coñecerá a dúas mulleres de diferentes idades e condicións sociais, configurando un "relato coral". o xurado valorou "a forza do argumento, o manexo da lingua e o carisma dos personaxes". Por outra banda, Leticia Barbadillo gañou o Premio Merlín 2023 con A botella de lentellas, a historia sobre un neno que, tralo internamento da avoa nunha residencia, decide facer por si mesmo as orellas doces que lle preparaba a súa avoa, e imaxinar as historias escoitadas por esas orellas. O xurado considerou que a novela é "unha singular e fermosa defensa do valor da ficción e do poder cativador dos contos". Esta é a primeira novela de Leticia Barbadillo. Aos Premios Xerais presentáronse este ano 87 obras. En outubro realizarase o acto de entrega e os libros estarán nas librarías.
