Urbano Lugrís protagoniza a imaxe da XIV (S8) Mostra Internacional de Cinema Periférico

Figuras claves do cinema de vangarda e experimental de moi diferentes xeracións atoparanse na Coruña entre os vindeiros 26 de maio e 4 de xuño no marco da XIV (S8) Mostra Internacional de Cinema Periférico. A organización deste encontro presentaba este 9 de maio a súa nova xeira, na que se proxectarán 180 filmes chegados dunha ducia de países. Cunha imaxe de Urbano Lugrís como bandeira, a S(8) reivindica o pintor coruñés considerado máximo expoñente do surrealismo no noso país.

Palexco, Domus, Fundación Luis Seoane, Filmoteca de Galicia e Afundación - Obra Social ABANCA acollerán as diferentes actividades desta edición, que achegará obras de Estados Unidos, Reino Unido, Canadá, Italia, Arxentina, Francia, Chile, Alemaña, República Checa, Corea del Sur, Portugal e España e conta cun total de 35 artistas convidados.

Entre as figuras internacionais presentes no evento, destaca Anthony McCall, mundialmente coñecido polos seus traballos de "luz sólida", e que protagonizará un ciclo monográfico cos seus filmes colectivos Argument e Sigmund Freud's Dora. Ademais, realizarase unha posta en escena dos seus traballos lumínicos e impartirá unha clase maxistral.

Canda a el, nos nomes convidados a organización apunta a Barbara Sternberg, que protagonizará dous focos nos que se estreará a nivel estatal grande parte da súa filmografía no formato orixinal de 16 milímetros. A sección Desbordamientos dedicada á film performance, contará coas propostas do canadense John Price e o artista surcoreano Hangjun Lee, mentres na liña de tender pontes co cinema experimental desenvolvido ao outro lado do Atlántico a mostra achegará o traballo do arxentino Benjamín Ellenberger no seu empeño por filmar a noite.

O habitual programa temático da mostra estará dedicado nesta ocasión ás Paisaxes encantadas "como aquelas que pintaba Lugrís" sinala a organización. A estrea internacional de And so it came about, de Charlotte Pryce, canda a filmes de Gaëlle Rouard, Ute Aurand ou Jennifer Reeves, así como do mítico creador checo Jan Svankmajer fan parte desta proposta. A organización adianta ademais, que se proxectarán 17 filmes de 20 nomes da creación audiovisual galega.

Ademais, ata o vindeiro 10 de xuño está aberto o prazo para participar na sétima edición das Residencias Artísticas Internacionais de Creación Cinematográfica – BAICC que a S(8) convoca en colaboración co LIFT-Liaison of Independent Filmmakers of Toronto e Acción Cultural Española (AC/E). Este programa impulsa a produción dunha obra audiovisual rodada en formato analóxico en Toronto (Canadá).