Morre en Ferrol Fernando Bores Gamundi

O xornalista Ramón Loureiro facíase eco, na sección local de Ferrol do xornal La Voz de Galicia, da perda para o mundo da cultura de Fernando Bores Gamundi o pasado día 10 en Ferrol. Arquitecto técnico de profesión, Bores Gamundi, participaba activamente da vida cultural e facía as súas achegas propias desde a súa profesión. Formaba parte do Club de Prensa de Ferrol, así como da Sociedade de Cultura Valle-Inclán. Ten publicados traballos sobre a arquitectura ferrolá e galega desde a perspectiva histórica, como autor e coordinador, como " Casas de indianos : Pontevedra" (Secretaría xeral de Emigración, Tórculo de Edicións, 2009) ou a edición das "Actas del Segundo Congreso Nacional de Historia de la Construcción A Coruña, 22-24 de octubre de 1998". Tamén coordinou a edición de varias publicacións da Sociedade de Cultura Valle-Inclán. Ademais, segundo lembra Ramón Loureiro, Bores Gamundi, foi impulsor do Premio Esquío de Poesíae da colección editorial resultante do certame, no que actuou como secretario do xurado. Fernando Bores falecía aos 76 anos de idade.

O Club de Prensa de Ferrol lamentaba nas súas redes sociais a perda do seu membro lembrando que "ademais da súa brillante traxectoria como arquitecto técnico e profesor, extraordinaria talla humana e clarividente visión culta e intelectual, Fernando Bores destacou polo seu activismo cultural, área que desenvolveu nos últimos anos a través do Club de Prensa de Ferrol, de cuxa directiva formou parte. O seu papel de firma colaboradora do Diario de Ferrol como experto en materias relacionadas coa arquitectura urbana, permitiulle no seu día ser chamado por Luís Mera para que se implicase no Club de Prensa de Ferrol. Neste sentido, cabe sinalar que foi unha persoa entregada con exquisita xenerosidade". Lembran desde a entidade que "seguindo as súas indicacións, chegáronse a editar un par de Cadernos Ferrol Análisis, sobre a "Arquitectura pública de Ferrol, 1977-2017", da autoría de Manuel A. Romero Pérez e Federico Carro Gil, e "Ferrol: Da arquitectura anónima á de autor", de Pablo Rei Martínez. Grazas á súa xestión, o Club de Prensa puido traer a Ferrol á destacada estudosa da figura e obra de Concepción Arenal, a catalá Anna Caballé. Entre os proxectos que non puido levar a cabo figura un terceiro traballo sobre a arquitectura urbana actual e un memorial sobre a rehabilitación de Herrerías na que interveu como técnico", apuntan desde o Club.