Un Pritzker con impacto en Galicia

Onte coñeceuse que o arquitecto británico David Chipperfield (Londres, 1953) fora galardoado co máis prestixioso dos premios da arquitectura, o Pritzker. Aínda que o galardón se concede a unha traxectoria -e a de Chipperfield é dilatada e dividida en moitos países-, o impacto do prestixio do premio tamén afectará a Galicia. Pritzker reside frecuentemente en Corrubedo (Ribeira) e participa dos debates ao redor da sustentabilidade local e a humanización urbanística do Barbanza a través da fundación RIA, promovida por el. De feito, na propia documentación oficial proporcionada pola Fundación Pritzker ao redor da nominación, sinálase que "nos anos recentes, Chipperfield desenvolveu un profundo cariño e devoción pola comunidade de Galicia, unha das rexións máis pobres de España, que paradoxicamente prospera cunha alta calidade de vida. Chipperfield patrocina a investigación, promove ideas e orienta o desenvolvemento futuro fomentando a protección local dos contornos naturais e construídos na ría de Arousa". A fundación RIA, financiada polo arquitecto inglés, adquiriu tamén un local en Santiago de Compostela, que se convertirá na súa sede. As instalacións acollerán proxectos ao redor de tres eixes: planificación urbana, xestión sustentable do territorio e a cultura do deseño arquitectónico e urbano. Pensan acoller estancias de estudantes, residencias de investigación e acordos con "institucións de referencia internacional". Se ben Chipperfield é unha das grandes figuras do deseño internacional, o premio Pritzker incrementará a visibilidade internacional deste novo centro cultural en Santiago de Compostela.