A rururbanía protagoniza a 18 edición da MICE

A rururbanía, "un concepto definido en relación a aqueles espazos, continuos ou híbridos, xurdidos dun proceso de urbanización de lugares do rural" será o eixe da décimo oitava Mostra Internacional de Cinema Etnográfico. O Museo do Pobo Galego co apoio do Concello de Santiago, a área de Cultura da Deputación da Coruña e a Axencia Galega das Industrias Culturais (Agadic) organizan este encontro, que se desenvolverá entre o 15 e o 21 de marzo vindeiros.

No ámbito formativo, o programa achega o obradoiro De quen é a historia? Prácticas audiovisuais colaborativas e a antropoloxía audiovisual a cargo de Chus Domínguez e Belén Sola. Na sección para público escolar, MICE Petís esta xeira inicia un programa piloto co alumnado de tres institutos galegos e co grupo mozo do CSC Aurelio Aguirre de Conxo, en Santiago de Compostela. As crianzas participantes realizarán unha curta etnográfica, desde a idea ata a edición final, que se poderá ver o día 31 de marzo no marco do programa. Ademais, facilitaranse sesións virtuais para centros educativos. A organización dará a coñecer en vindeiras datas o programa completo da edición.