Foto: romanarmy.eu
Un equipo arqueolóxico do colectivo romanarmy.eu está xa a traballar no campamento romano de Penedo dos Lobos (Manzaneda, Ourense) co obxectivo de coñecer en profundidade a estrutura defensiva deste recinto militar de campaña, é dicir, dun asentamento non estable dun continxente militar en movemento. A fortificación conta cunha singular muralla en pedra e conserva as catro portas ao recinto, e os científicos están a traballar como foi construída. O que facía un grupo de 300 militares romanos a máis de 1.400 metros de altitude é difícil de saber, pero os materiais localizados na primeira campaña de 2018 situaban a construción do campamento no contexto cronolóxico das Guerras Cántabras (29 a.C. - 19 a.C). A intervención, promovida pola Universidade de Salamanca coa dirección científica do profesor desa universidade José Manuel Costa e João Fonte, da Universidade de Exeter, e a dirección técnica de Francisco Alonso Toucido (Tempos Arqueólogos), tamén está a explorar o impacto das accións furtivas de saqueo do xacemento por parte de detectoristas de metais. Estes foron vistos no xacemento en varias ocasións e a metade de campaña, todo parece indicar que esta práctica ilegal tivo un forte impacto no rexistro arqueolóxico, facendo desaparecer obxectos e información de contexto. A intervención arqueolóxica está financiada por Turismo de Galicia coa colaboración do concello de Manzaneda e o Instituto de Ciencias do Patrimonio do CSIC.
