Comeza a restauración de canóns de bronce no Museo do Mar

O Museo do Mar de Vigo, como centro de referencia no país no campo da arqueoloxía subacuática, iniciou nas últimas semanas os traballos de restauración de canóns de bronce. Estas pezas datas entre os séculos XVI e XVIII proceden de diferentes naufraxios nas costas galegas e foron recuperadas no seu día pola Armada Española e depositados nas instalacións deste centro.

A Xunta de Galicia contou con Christopher Dostal, experto internacional en tratar elementos de arqueoloxía subacuática para esta tarefa. Dostal estivo a aplicar un sistema de redución electrolítica en cubas de aceiro, con desionización de auga e diferentes produtos químicos para eliminar a corrosión que o mar produce no bronce.

Segundo sinala a Xunta, o sistema "garante un tratamento eficaz, rápido e perdurable fronte a outras técnicas". Logo da posta en marcha do proceso, Dostal voltou a Estados Unidos, desde onde supervisará o desenvolvemento do mesmo.

A aproveitar a estadía deste especialista, o Museo do Mar acolleu visitas de empresas galegas especializadas en arqueoloxía subacuática e o alumnado de Arqueoloxía da Escola de Conservación e Restauración de Bens Culturais de Galicia, que puideron coñecer este método de traballo.