Sanatorio de Cesuras Foto: Lista Vermella - Hispania Nostra
O Consello da Xunta vén de autorizar a subscrición dun convenio de colaboración entre a Vicepresidencia Primeira, a través da Axencia Turismo de Galicia, e o Concello de Oza-Cesuras para a recuperación e posta en valor do sanatorio de Paraxón para uso turístico cultural, por un importe total de 571.457,06 euros, en dúas anualidades. O obxectivo do proxecto é poñer en valor o edificio modernista proxectado nos anos 20 polo arquitecto Antonio González Villar, cando a tuberculose representaba un problema de saúde no territorio pero que non chegou a ser rematado e cuxo mal estado de conservación e mantementos o situara na non-oficial "lista vermella" de patrimonio en perigo. Con esta nova actuación acometerase unha rehabilitación integral do edificio e da súa contorna, que permitirán transformalo en polo de atracción turística do concello e do xeodestino das Mariñas Coruñesas.
Situado nun lugar de gran valor paisaxístico, nunha zona catalogada como reserva da biosfera Mariñas Coruñesas e Terras do Mandeo, a actuación permitirá non só conservar a edificación senón transformar o sanatorio nunha peza clave na configuración da oferta e demanda do patrimonio, actuando como foco de atracción de visitas. O convenio de colaboración executarase entre este ano e o vindeiro. De feito, a maior parte do investimento realizarase en 2022, o que permitirá acometer a rehabilitación proxectada do edificio, dinamizar a contorna do sanatorio e converter este punto en parada obrigatoria de peregrinos, turistas, visitantes ou veciños da comarca, co fin de dinamizar o turismo da zona. O Sanatorio de Paraxón xa foi obxecto de axudas por parte do Goberno galego nas anualidades 2019 e 2020 para a rehabilitación do bloque sanitario e para a adecuación do espazo destinado ao estacionamento temporal de vehículos no lugar do Paraxón Bragade, actuacións que supuxeron un investimento de máis de 60.000 euros.
