Demo Editorial lanza este mes de novembro o volume Castelao, integral. A obra compila os catro títulos da serie que realizaron Inacio Vilariño e Iván Suárez co rianxeiro como protagonista. O lanzamento, que quere sumarse ás conmemoracións polo 75 aniversario do pasamento do galeguista, conta con 248 páxinas en branco e negro.
O volume, encadernado en tapa dura, sae nunha tirada limitada de 500 exemplares e contou co apoio económico da Deputación da Coruña.
De xeito paralelo, o ourensán David Rubín acaba de lanzar en Estados Unidos a primeira entrega da serie Space Scouts. Dark Horse publica, con guión de Matt Kindt, esta obra de ciencia ficción que prevé ter para o vindeiro mes de maio publicado o seu primeiro volume recompilatorio. No mesmo poderán lerse os tres primeiros números da serie cun total de 144 páxinas.
