Continúan os lanzamentos de autores galegos en Estados Unidos. O vindeiro 23 de outubro Image lanza o primeiro volume Pretty Deadly, de Emma Ríos con guión de Kelly Sue DeConnick. Serán 32 páxinas a toda cor que inician a nova serie da galega. De xeito paralelo, David Rubín acaba de anunciar que está a traballar na serie The rise of Aurora West. Sobre guión do recoñecido Paul Pope e de JT Petty, a obra constará de dous volumes dunhas 150 páxinas que sairán da man da editorial First Second. A publicación alternarase coa da serie Battling Boy da cal o novo traballo de Rubín é un spin-off.
