Chévere estrea N.E.V.E.R.M.O.R.E. co Centro Dramático Nacional

A montaxe inicia o 17 de setembro no teatro María Guerrero de Madrid unha xira que chega a Galicia o 22 de outubro

O Teatro María Guerrero de Madrid acolle este 17 de setembro a estrea de N.E.V.E.R.M.O.R.E. A última produción de Chévere co Centro Dramático Nacional propón unha reflexión sobre a memoria e as catástrofes nunha montaxe na que o son adquire especial importancia e que se ambienta na marea negra provocada polo Prestige. Patricia de Lorenzo, Miguel de Lira, Manuel Cortés, Mónica García, Arantza Villar e Borja Fernández ocupan o escenario baixo dirección de Xesús Ron nesta oara que se poderá ver na capital española ata o vindeiro 10 de outubro. A obra "parte do berro do famoso corvo do poema de Poe para trazar un paralelismo entre a catástrofe do Prestige e a pandemia do COVID 19, e debuxa un mundo que habita permanentemente na catástrofe", explica a compañía.

Segundo recolle Chévere no seu web "para nós N.E.V.E.R.M.O.R.E. é unha forma de acudir á memoria colectiva dun deses pobos que se poden borrar do mapa sen que pase nada. Un pobo que, así e todo, en decembro de 2002 fixo seu o berro do corvo e non se deixou convencer polas mentiras daqueles que aseguraban que todo volvería ser coma antes. Contar esta historia é tamén un conxuro para desfacer o feitizo que sigue rodeando a catástrofe do Prestige, convertida nunha metáfora estrañamente perfecta desa cultura do petróleo que nos impide ver que hai máis alá da catástrofe, coma se non puidésemos habitar outro lugar que non sexa ese. Coma se non fose posible encontrar un rinoceronte gris dentro dunha caixa negra".



A estrea estará acompañada o vindeiro día 20 da proxección de Eroski Paraíso e un coloquio posterior e mais do debate Carta Blanca sobre (marea) negra o día 21. Con posterioridade o espectáculo continuará a súa xira por Galicia, con tres funcións en Santiago de Compostela (do 22 ao 24 de outubro), Lugo (6 e 7 de novembro), Ferrol (12), Vilagarcía (13), Pontevedra (18), A Coruña (3 e 4 de decembro), Ourense (10 e 11), Vigo (27 de xaneiro), e Narón (29), ademais de representacións previstas en Valladolid, Barcelona ou Sevilla entre outras localidades.