Cos catro recentes Premios María Casares pola obra 'A lingua das bolboretas' xa colocados nos seus andeis, a compañía ourensá Sarabela Teatro estrea esta mesma semana unha nova montaxe e faino na súa cidade. A obra 'Morgana en Esmelle' presentarase no Auditorio municipal de Ourense o venres 17 de setembro e estará en cartel toda a fin de semana. O espectáculo supón o regreso á dirección de Ánxeles Cuña, que estará á fronte dun elenco formado por Fernando Dacosta, Laura Míguez, Fina Calleja, Sabela Gago, Quico Cadaval, Elena Seijo e Nate Borrajo. Levarán á escena a adaptación dun texto orixinal do mesmo título da xornalista e escritora Begoña Caamaño (Vigo, 1964- 2014) preparado pola propia Cuña.
'Morgana en Esmelle' trátase dunha obra que, explica a compañía, reescribe o mito cunha ollada contemporánea, achegando unha ollada diferente sobre o mundo artúrico e a Terra de Miranda. Segundo a sinopse, a obra pregúntase se son os remordementos e as culpas sentimentos que nos acompañan toda a vida ou se temos acaso dereito a esquecer os danos causados polas nosas decisións. Con preguntas semellantes, a chegada de Morgana racha a aparente serenidade coa que Merlín vive na fraga de Esmelle. Morgana, a medio irmá e amante de Artur entra na casa de Miranda en procura de respostas á súa infelicidade. Coa súa dor e coas lembranzas de Merlín vaise tecendo o fío da memoria ata descubrir as razóns últimas da ruína de Avalon e da caída de Camelot. As entradas xa están á venda e o aforo será do 50%.
'Morgana en Esmelle' trátase dunha obra que, explica a compañía, reescribe o mito cunha ollada contemporánea, achegando unha ollada diferente sobre o mundo artúrico e a Terra de Miranda. Segundo a sinopse, a obra pregúntase se son os remordementos e as culpas sentimentos que nos acompañan toda a vida ou se temos acaso dereito a esquecer os danos causados polas nosas decisións. Con preguntas semellantes, a chegada de Morgana racha a aparente serenidade coa que Merlín vive na fraga de Esmelle. Morgana, a medio irmá e amante de Artur entra na casa de Miranda en procura de respostas á súa infelicidade. Coa súa dor e coas lembranzas de Merlín vaise tecendo o fío da memoria ata descubrir as razóns últimas da ruína de Avalon e da caída de Camelot. As entradas xa están á venda e o aforo será do 50%.
