David Lamelas protagoniza a nova exposición do CGAC

Lonxe, América é o título da nova exposición que abre as súas portas este 23 de xullo no Centro Galego de Arte Contemporánea. O artista arxentino de ascendencia galega David Lamelas ocupará as salas do centro ata o vindeiro tres de outubro coa que é a primeira retrospectiva da súa obra en España. Na mesma poderá seguirse a evolución do seu traballo desde os anos sesenta ata a actualidade. A relación do autor con Galicia e a importancia do proxecto e mais do debuxo na súa práctica artística son os eixes deste proxecto expositivo, que inaugurou o día 22 o secretario xeral de Cultura da Xunta, Anxo M. Lorenzo.

A mostra conta con préstamos de doce museos europeos e americanos ademais de achegas de coleccionistas particulares. Segundo adiantou a Consellería de Cultura, a nova exposición "establecerá un diálogo virtual coa obra doutros artistas conceptuais que pasaron antes polas salas do CGAC, e que conforman unha parte importante da historia e da identidade do museo, algúns dos cales foron próximos a Lamelas, como Marcel Broodthaers (Cinéma, CGAC, 1997-1998) ou Bas Jan Ader (In Search of the Miraculous. Treinta años después, CGAC, 2010)".

De xeito paralelo, desenvolveranse actividades como a perfomance Time (1979-2021) do propio artista o día 23, á que seguirá unha conversa entre o artista e o comisario da exposición, Pedro de Llano Neira. Tamén se farán visitas guiadas cada domingo ás 12 horas. A coincidir con este proxecto, o CGAC publicará un catálogo cunha colección de textos do artista combinados con achegas de diferentes especialistas en historia da arte. Ademais, reeditouse e traduciuse ao galego e ao castelán unha das obras máis emblemáticas de Lamelas, o libro de artista Publication, de 1970.


Presentación da reedición de Publication no Youtube do CGAC

Nado en Bos Aires en 1946, David Lamelas é un dos artistas con maior influencia internacional do seu país. Ao longo da década dos 70 o seu traballo experimentou unha veloz maduración que o impulsou desde a escena artística da súa cidade natal, onde participou en diversas actividades do lendario Instituto di Tella, ata integrarse nas redes da arte conceptual que transformaron radicalmente o paradigma artístico a partir de 1968.

A súa obra foi mostrada de maneira individual no Kunstverein de Münich (1997), no Museo Tamayo da Cidade de México (2004) e, máis recentemente, nas exposicións retrospectivas que se presentaron no University Art Museum de Long Beach (California, Estados Unidos) en 2017, e no MALBA de Buenos Aires en 2018. Ademais, os seus traballos forman parte de prestixiosas coleccións públicas e privadas e foron incluídos en bienais como as de Venecia e São Paulo, en 1967 e 1968, respectivamente, ou, máis recentemente, na Documénta de Kassel de 2017.