O Arquivo Vidal incorpora 74.560 fotografías históricas aos seus fondos

O Museo de Laxe está a ultimar o procesamento de 74.560 novas imaxes que pasarán a engrosar os fondos do Arquivo Fotográfico Vidal. Este legado, declarado Ben de Interese Cultural, sumará a colección de fotografías de José María Vidal Eiroa, último membro da histórica saga de fotógrafos locais, ás preto de sesenta mil fotografías de Plácido Vidal Díaz e José María Vidal García que conserva. Os retratos achegan unha crónica da vida na Costa da Morte entre os anos 60 e 90 do pasado século.

Dentro dos fondos que agora se incorporan ao arquivo inclúense 150 imaxes que se atribúen a José Vidal García, pai de José María, e non se desbota que poidan aparecer máis fotografías da súa autoría. Logo da limpeza e dixitalización dos negativos, na actualidade está a se desenvolver un proceso de retoque fotográfico que se estima durará aínda varios meses, ao igual que o arquivo e clasificación completa do material, que se agarda completar ao longo deste ano.

Segundo explica o Concello de Laxe, a temática das fotografías recuperadas é moi variada. "Vodas, bautizos e comuñóns, retratos individuais, colectivos, familiares, eventos sociais, relixiosos e políticos (visita de Fraga a Laxe, Visita de Beiras, Visita do expresidente Laxe, mitins...), acontecementos deportivos (fútbol, vela...), oficios, actividades portuarias, patrimonio cultural (pazos, igrexas, dolmenes,....), festas, orquestras, salas de festas, as praias e os bañistas, casas, .....etc". Con Bergantiños e Soneira como áreas máis representadas, as imaxes inclúen escenas da Cidade da Coruña e da zona sur da Costa da Morte (Muxía, Fisterra e Corcubión).

Na nota de presentación destacan que "as fotografías de José María Vidal Eiroa están influenciadas polo seu pai José Vidal García e avó Plácido Vidal Díaz, pero non chegando a mestría dos seus devanceiros. Hai moitos momentos de xenialidade e brillantez na toma das fotografías, pero é un fondo moi curioso e moi interesante para comprender os cambios na nosa zona nas catro últimas décadas do século XX".