Unha exposición amosa a forza da conexión de Emilia Pardo Bazán con Santiago

A conmemoración este 2021 do centenario do pasamento da escritora Emilia Pardo Bazán dá outro paso grazas ao Ateneo de Santiago e a USC. O Colexio de Fonseca acolle desde onte a mostra ‘Dona Emilia e Compostela’, que amosa a presenza e relación da escritora coa capital galega a través de visitas, estadías, relacións, amizades, lembranzas ou testemuñas. A exposición tamén afonda na pegada que deixou a cidade na súa obra ao converterse en escenario de novelas e contos; fonte de asuntos para os seus relatos e crónicas; tema de ensaios, conferencias, crónicas e artigos xornalísticos, cartas privadas ou mesmo escritos autobiográficos. A mostra permanecerá aberta ao público ata o 24 de abril.

A exposición divídese en dúas partes. A primeira repasa cronoloxicamente os principais momentos da biografía da autora entre 1866 e 1879. Este apartado recolle edicións deses anos, procedentes das bibliotecas da USC, ou de bibliotecas particulares; documentos e manuscritos autógrafos, procedentes do Arquivo da Real Academia Galega; gravados, ou reproducións de noticias e comentarios na prensa periódica coetánea. A segunda parte, centrada entre 1879 e 1920, dedícase á presenza de Santiago na obra literaria de Pardo Bazán. Neste senso, abórdase unha selección das súas novelas e contos, así como unha relación dos ensaios, crónicas e artigos xornalísticos expresamente referidos a Santiago, ilustrada coa reprodución facsímile ampliada da correspondente publicación na prensa periódica, e con gravados ou fotografías antigas dos temas, asuntos, personaxes, lugares ou monumentos tratados nas pezas xornalísticas.