A versión audiovisual da obra 'O charco de Ulises' do CDG transmitirase aos centros de ensino

A exhibición en liña conmemorará o Día Internacional do Teatro entre o estudantado

A exhibición en liña conmemorará o Día Internacional do Teatro entre o estudantado
'O charco de Ulises', Centro Dramático Galego
A última produción do Centro Dramático Galego (CDG), O charco de Ulises , chegará nunha versión especial en formato audiovisual o vindeiro 26 de marzo aos centros educativos, co gallo da conmemoración o sábado 27 do Día Internacional do Teatro. A través dunha conexión que se facilitará xunto co convite, o alumnado de 3º e 4º da ESO e de Bacharelato poderá gozar da adaptación do clásico grego dirixida por Marián Bañobre e Santiago Cortegoso que foi estreada pola compañía pública o pasado xaneiro. A exhibición en liña completarase cun coloquio no que participarán membros do equipo artístico e unha mostra do proceso de creación do espectáculo. A iniciativa enmárcase na aposta que está a facer a Xunta para achegarlle o teatro ao estudantado galego, ante as restricións de mobilidade e a suspensión das exhibicións por mor da covid-19.

Así, o CDG emitirá unha versión especial do espectáculo para adaptarse á organización dos centros de ensino e á linguaxe audiovisual. Trátase, deste xeito, de motivar os máis novos a asistir ás funcións de O charco de Ulises que percorrerán Galicia na xira prevista para finais deste ano e coas que poderán gozar en vivo da representación nos escenarios. Para a compañía teatral pública, a iniciativa dálle continuidade ao seu programa de difusión en liña, inaugurado o pasado 24 de xaneiro en colaboración coa Secretaría Xeral da Emigración da Xunta, nunha emisión da mesma obra que acadou 800 conexións desde 18 países en catro continentes.