Un proxecto divulgará a visión da arte contemporánea galega sobre os conflitos armados

A visión da guerra na arte contemporánea galega é o eixe do programa Da guerra como arte á arte en contra da guerra que se presentaba na mañá deste 13 de xaneiro na Deputación da Coruña. A entidade provincial achegou esta iniciativa da firma A Forxa e que coordina Rosario Sarmiento unha das axudas para proxectos culturais singulares. O proxecto quere dar a coñecer a perspectiva que diferentes firmas da arte do país tiveron sobre os conflitos armados.

Así, distintas actividades e publicacións amosarán os traballos de Luis Seoane, Castelao, Colmeiro, Arturo Souto e Federico Ribas a denunciar a Guerra Civil ou o labor de Isaac Díaz Pardo, Conde Corbal, Agustín Pérez Bellas, Mercedes Ruibal, Xaime Quessada, Francisco Leiro, Jorge Castillo, Reimundo Patiño, Xavier Correa, Antón Patiño ou Caxigueiro sobre diferentes conflagracións. A Coruña, Sada, Betanzos, Oleiros, Santiago e Ferrol acollen ao longo do primeiro trimestre de 2021 as actividades incluídas neste proxecto, que inclúe materiais audiovisuais e impresos, coa edición de máis de 2.000 folletos e carteis.