O CGAC retoma o calendario expositivo con Wonder Women

Este 19 de xuño abre as súas portas a proposta coa que o Centro Galego de Arte Contemporánea retoma o seu calendario expositivo. Agar Ledo, Pedro de Llano e Santiago Olmo comisarían Wonder Women. Artistas mulleres na colección CGAC, mostra que se poderá ver ata o vindeiro 6 de setembro. O proxecto está composto por pezas de autoras como Esther Ferrer, Fernanda Fragaterio, Isabel Garay, Dora García, Menchu Lamas, Jac Leiner, Luz Lizarazo, Eva Lootz, Alicia Martín, Susan Philipsz ou da prestixiosa artista norteamericana Dana Birnbaum que fan parte dos fondos do centro e que se presentan agora a dialogar.



Segundo explica a presentación do proxecto, "cada unha das pezas desta exposición mostra os cambios profundos producidos ao longo das últimas décadas. Voces de artistas mulleres que non só falan de feminismo ou de cuestións vinculadas con debates de xénero, senón que abordan tamén problemas estéticos ou construtivos. Pintura, escultura, arte sonora, ready-made ou obxecto atopado, vídeo ou instalacións tenden a subliñar as condicións visuais das obras, en diálogo tanto entre elas como co espazo (vestíbulo, auditorio e outros lugares intermedios que non foron concibidos orixinalmente polo arquitecto Álvaro Siza Vieira como espazos expositivos)". O CGAC adianta que esta iniciativa "é o punto de partida para un traballo de equipo cuxo obxectivo é investigar sobre a colección e as súas posibilidades con vistas a unha futura exhibición razoada e histórica".