O Festival Virtual do Libro xa ten programa completo con ducias de actividades

O Festival Virtual do Libro de Galicia (FLIV) xa ten o programa completo para a que vai ser a súa primeira edición entre o 26 e o 28 de xuño. Desde o seu anuncio o FLIV foi soltando por pingas moitas das actividades que estaba a preparar para este evento en liña e agora por fin ven de presentar o que será xa o seu programa definitivo, cos nomes, horarios e espazos virtuais nos que terá lugar cada actividade. Máis de 50 autores pasarán neses tres días por algunha das ducias de propostas deste encontro pioneiro no formato dixital pero que ofrece modelos de actividade aos que estamos afeitos nas citas presenciais habituais: conferencias, mesas redondas, presentacións de libros, encontros con autores, recitais, etc. O seu sitio web, dividido en seis espazos diferentes de nome tamén relativo aos espazos físicos habituais que non resultan familiares nun encontro feiral (Auditorio Xulio Amigo, Salas 1 e 2, Cafetería, Sala de Exposicións, Aula María Barbeito) Todos os detalles aparecen pensados para que o traslado ao mundo virtual nos resulte do máis amigable, pero haberá que seguir atentos aos horarios porque son varias as cousas en liña simultáneas nos diferentes espazos do encontro, e aínda que poidan estar despois accesibles, para velos en directo tamén haberá que facer unha selección, como en calquera feira.

O programa habitual despregarase entre as 11 da mañá e as 10 da noite. Como é normal, abundan as presentacións de libros -ata 15 chegarán a facerse- e os formatos de reflexión e diálogo coma conferencias e mesas redondas -dez nos tres días- que tocarán temas coma o papel da lectura na sociedade, o xénero negro, a ficción escénica, a literatura galega da diáspora ou a tradución entre outros moitos. Os recitais estarán tamén moi presentes e ata seis deles terán o seu momento no programa, alén da mostra de videopoesía Espellos, comisariada por Celia Parra, que a modo de exposición acompañará o evento Tamén haberá momentos nas conferencias para falar sobre a Xeración Nós e sobre o homenaxeado das Letras Galegas deste ano, Ricardo Carballo Calero, e tamén facer a presentación dunha banda deseñada sobre a súa figura. O espazo virtual da cafetería será o designado para os encontros con autores polos que pasarán Ledicia Costas, Francisco Castro, Vicente Araguas, Natalia Carou e Cristian F. Caruncho. A feira ten tamén espazo para outras expresións artísticas realcionadas. É o caso do teatro, con lecturas dramatizadas a cargoi de Raquel Castro, Paula Carballeira, Carlos Labraña, Ana Abad de Larriva, Ernesto Is, Avelina Pérez, Santiago Cortegoso, María Armesto, Roberto Salgueiro, Vanesa Sotelo e Esther F. Carrodeguas. Tamén para o audiovisual con dúas proxeccións de documentais : O Des-(en)freo, arredor da figura de Emma Pedreira, e Ilustr-ando, arredor do traballo de Luz Beloso. Dous obradoiros sobre maquetación e narrativa porán a parte formativa ao programa e cada noite rematarase a xornada cun clube de lectura a modo de Sesión Golfa sobre os libros Be Water (ed. Cuarto de Inverno) de Antía Yáñez, Un lume azul (ed. Xerais) con Pedro Feijoo e Carrusel (ed. Galaxia) de Berta Dávila. Na Cafetería.