Imma António protagonizará o VII Día das Galegas nas Letras

Cun manifesto titulado A palabra no escenario o colectivo A Sega daba a coñecer este martes 25 de febreiro o nome da autora que será homenaxeada no VII Día das Galegas nas Letras. A plataforma de crítica literaria acordou dedicarlle esta data a Imma António, dramaturga, actriz e responsable de vestiario e de escenografía en diferentes producións teatrais, ademais de actual presidenta da Academia Galega de Teatro.

No seu manifesto, A Sega reivindica o traballo da autora a sinalar que "ela escribe. Desde a soidade do seu espazo, chanta no papel persoas de onte, de hoxe e de mañá: a humanidade que habita en cada ser. Pénsalles a voz, os movementos, os desacougos, as alegrías. Nacen espidas e ela ponlles roupa. Nácenlle no país das súas palabras, no seu laboratorio, cuarto propio íntimo. Nácenlle das palabras que dela nacen".

Do mesmo xeito, apunta a importancia do labor actoral da homenaxeada de quen a plataforma indica que se mete "nas palabras e nos seus silencios, pénsaas, devóraas, expúlsaas. Habita en cada unha e alentan no xesto: a rebeldía. Dálle vida ás palabras coa voz, co silencio, co corpo, co movemento. Hai tantos mundos no seu interior e ela desfacéndose dela, espíndose, habita todos eses mundos. Non é maxia. É traballo digno".

O Día das Galegas nas Letras celébrase cada quince de agosto a homenaxear en cada xeira "unha muller que contribuíse de forma sobranceira á cultura en xeral e á literatura en particular".