El ladrillo de Patrick Hamilton toma o DIDAC

El ladrillo, libro de política económica que marcou as pautas do sistema de libre mercado implementado en Chile pola ditadura militar é a base da exposición que abre hoxe a sala DIDAC en Santiago de Compostela. O artista belga Patrick Hamilton parte desta obra para desenvolver a súa mostra El ladrillo II, que se poderá ver ata o vindeiro 19 de outubro e que supón a primeira exposición individual do autor no noso país. Hamilton desenvolverá ademais o día 7 un obradoiro infantil. O traballo deste artista é internacionalmente recoñecido e estivo presente este mesmo ano mo Museo Reina Sofía de Madrid.

Segundo explica a presentación da mostra, "Hamilton presenta unha serie de traballos nos que de maneira poética reformula o entendemento dalgúns conceptos como: equilibrio / desequilibrio, igualdade / desigualdade, regulación / des-regulación, individuo / comunidade. Para isto, utiliza elementos comúns no mundo do traballo da construción e a albanelería como aplanadores, ladrillos e lixas. Creando composicións simples e económicas Hamilton xoga con diversas connotacións da palabra ladrillo" e "introduce procedementos e elementos que remiten á memoria colectiva, como por exemplo, a dos movementos sindicais no caso das esculturas Pirámide e Pirámide invertida, pintadas en vermello e negro; as pinturas/collages feitos con lixa e elaboradas de maneira mecánica e repetitiva ao modo dun albanel que constrúe un muro ou pavimento; así como, as dúas fotografías de obxectos e arquivos atopados, dispostos en clave «construtivista» á maneira de naturezas mortas".