Outorgadas as III Residencias Paraíso do Colectivo RPM e AGADIC

A terceira convocatoria do programa Residencias Paraíso ven de resolver os destinatarios das súas axudas para a investigación e creación arredor da danza e as artes vivas contemporáneas. O Colectivo RPM, impulsor do programa en colaboración coa Axencia Galega de Industrias Culturais (Agadic), ven de anunciar os 10 proxectos seleccionados para recibir estas axudas que estarán en residencia noutros tantos espazos e en total recibirán 20.000 euros en metálico, entre 1.500 e 3.000 cada un dependendo das propostas. A recepción de proxectos solicitantes deste ano, segundo o colectivo RPM, amosou un aumentou da presenza de proposta de fóra do noso territorio, o que, segundo ele, "fai pensar que cada vez máis se dirixe a mirada do panorama nacional cara a Galicia. Dalgún xeito, a sensación que temos é de que cada vez máis o ecosistema cultural español mira cara a comunidade artística galega, unha comunidade que impulsa tanto proxectos propios como iniciativas independentes comprometidas co sector que están alimentando enormemente o noso contexto particular", din.

A selección do grupo de artistas en 2019, decidida por un grupo de expertos, tentou acadar un equilibrio xusto entre traxectorias máis consolidadas e o impulso a proxectos máis novos, así como balancear proxectos con distintas linguaxes e campos de actuación, acentuando as fases tanto de investigación como de creación.
Os proxectos seleccionados foron:
Berio Molina e Macarena Montesinos co proxecto Manifesto Piqui Piqui, en residencia na Sala X da Facultade de Belas Artes de Pontevedra e cunha cuantía de 1.700 euros.

Colectivo LAG (Lara Buyo e Ana Corujo) co proxecto Libertad Condicionada, en residencia no Vello Cárcere de Lugo e cunha contía de 1.500 euros.

Compañía Elahood (Julia Laport e Sabela Domínguez) co proxecto Análise da feminidade a través do Waacking, en residencia no Auditorio Municipal de Ourense e cunha contía de 1.500 euros.

Compañía Prácido Domingo (Fran Martínez, Belén Bouzas e Diego M.Buceta) co proxecto Pentecostés, en residencia no Teatro Rosalía de Castro da Coruña e cunha contía de 2.100 euros.

Incendiaria (Davide González) co proxecto Microspectivas dun marica millennial, en residencia na Sala Agustín Magán do CSC de Santa Marta de Santiago de Compostela e cunha contía de 2.100 euros.

Matías Daporta co seu proxecto Bailarina Croma Mockup, en residencia no Pazo da Cultura de Carballo e cunha contía de 1.900 euros.

Manuel Parra / Proxecto Pank con imaxe 5 X 3.5, en residencia no Pazo da Cultura de Narón e cunha cuantía de 1.900 euros.

Irene Cantero co proxecto Los años luz, en residencia na Igrexa Santa María da Madalena a través da Mostra Internacional de Teatro de Ribadavia e cunha cuantía de 1.900 euros e aloxamento incluído.

Antes Collado co proxecto Crisálida, en residencia no Teatro Colón da Coruña e cunha contía de 3.000 euros.

Túlio Rosa co proxecto Pico y pala: estrategia para los cobardes, en residencia na Fundación Luis Seoane da Coruña e cunha contía de 2.600 euros.