Os membros da chamada Xeración Z, nados entre 1990 e 1999, falan menos galego que os de xeracións anteriores. Así o afirman os resultados dun estudo no que está a traballar o Seminario de Sociolingüística da Real Academia Galega que Xaquín Loredo, membro deste equipo, adiantou onte nas V Jornades La recerca sociolingüística en l'àmbit de la llengua catalana, do Institut d'Estudis Catalans. Os datos desta análise que a RAG elabora co apoio da Deputación de Pontevedra salientan tamén que esta xeración ten menos prexuízos cara á nosa lingua.
En particular, e segundo adianta a Academia, as "valoracións máis positivas da lingua galega danse especialmente cando se acompaña dunha fonética e prosodia castelás, mentres que as percepcións sociais máis negativas se asocian á expresión en castelán con fonética galega". Deste xeito, a entidade asegura que "segue a haber fortes prexuízos contra os trazos fonéticos e prosódicos propios do galego" aínda que se comeza a "asociar a lingua galega a valoracións máis positivas, relacionadas coa dimensión competencia-status social". Fronte a isto, o uso habitual do galego baixa do 44,2% da xeración do milenio ata o 33,6%, na Xeración Z, mentres o monolingüismo en castelán para a ser entre estes a opción maioritaria, cun 33, 8%.
