A RAG alerta da ruptura na transmisión interxeracional no Día da Lingua Materna

"Entre a poboación xeral, o perfil máis frecuente é o das persoas que empregan como lingua habitual o galego (31%) ou tanto o galego como o castelán (42%)". Estes son algúns dos datos que se inclúen na publicación Lingua e sociedade en Galicia. Resumo de resultados 1992-2016 que a Academia acaba de facer público no seu web a coincidir coa celebración do Día da Lingua Materna. Este informe, que resume e actualiza os datos de Lingua e sociedade en Galicia. A evolución sociolingüística 1992-2013, amosa a "vitalidade incuestionable" da nosa lingua, que conta con máis de 1,3 millóns de galegofalantes habituais. Deste xeito, e segundo adianta a páxina web da RAG, "os datos do CIS de 2016 amosan que o galego é a lingua materna do 44,7% das persoas de 18 ou máis anos, fronte ao 30,7% que teñen como lingua inicial o castelán ou o 23,6% con ambas". No entanto, a RAG advirte da ruptura na transmisión interxeracional do galego, que supón un risco para o futuro da lingua.



Deste xeito, os datos alertan tamén da tendencia negativa xa que "se na análise se ten en conta a poboación máis nova, desde os 5 anos, e se detén nos 65, a lingua inicial maioritaria empeza a ser o castelán (38% fronte ao 34% do galego e o 28% de ambas), que é tamén o idioma que emprega habitualmente unha maior proporción nesta ampla franxa de idade que conta coas xeracións máis novas".

Ante estes datos, e segundo explica Henrique Monteagudo, coordinador do Seminario de Sociolingüística da RAG, "a nosa ética profesional, na liña da acción continuada da Real Academia Galega canto entidade legalmente encargada da defensa e ilustración da lingua galega, obrígamos a lanzar a voz de alerta, unha voz que quere ser alentadora, pero que non pode deixar de expresarse en tons de alarma". A publicación inscríbese nunha liña de investigación emprendida pola Sección de Lingua do Consello da Cultura Galega (CCG) en colaboración co Seminario de Sociolingüística da RAG que deu pé xa a diferentes publicacións sobre estas cuestións.