O Salón Viñetas premiará a visita ás súas exposicións

Co ánimo de promover a visita das súas exposicións o Salón Viñetas desde o Atlántico porá en marcha unha acción usando para iso o seu propio folleto informativo. A guía informativa, da que se editarán e distribuirán 5.000 exemplares servirá tamén como un "pasaporte" polas distintas sedes expositivas do Salón de este ano. O documento de man, que inclúe información sobre as exposicións deste ano e as súas localizacións, así como as conferencias e mesas redondas ou as sinaturas e actividades da Rúa da BD, que un ano máis se situará nos xardíns de Méndez Núñez. O documento conterá, como novidade, un apartado especial con seis espazos nos que a veciñanza poderá certificar, coa axuda do persoal das salas, a súa visita a seis das sedes desta edición de Viñetas: o Kiosco Alfonso, o Pazo Municipal de María Pita, a Sala Municipal de Exposicións Palexco, a Casa de Cultura Salvador de Madariaga, a Sala AFundación e a Fundación Barrié. Deste xeito, tras cada visita, o persoal das salas de exhibición selará o documento de man ás persoas que así o desexen. Unha vez estea completo o documento acreditativo, a cidadanía poderá achegarse até as casetas de Información da Rúa da BD.e as 500 primeiras persoas que presenten o seus folletos selados con todas as opcións obterán un dos catálogo conmemorativos do Salón de este ano.

Viñetas desde o Atlántico contará, nesta edición, con sete sedes expositivas. Así, o Pazo de María Pita acollerá unha mostra coa obra do último Premio Nacional de Cómic, Pablo Auladell; o Kiosco Alfonso, a obra de Eduardo Risso, Ralph Meyer, Kiko Da Silva, Cameron Stewart e Julie Rocheleau; a Sala Municipal de Exposicións Palexco, o traballo de Bruno Chevrier (Nob), Rayco Pulido, Dave McKean e Natacha Bustos; a Casa da Cultura Salvador de Madariaga a proposta Da novela ao cómic , de Javi Rey e Ernest Sala, e o Fóra de Mapa de Emilio Fonseca, premio Castelao 2016; e a Torre de Hércules mostrará todos os carteis das distintas edicións de Viñetas desde o Atlántico. Ao circuíto de equipamentos municipais este ano súmanse dous espazos expositivos. Así, a Fundación Barrié acollerá Dez anos de Premio Nacional de Cómic , unha mostra pioneira na que a cidadanía poderá achegarse á obra dos últimos dez galardoados con este recoñecemento, entre os que se atopa Miguelanxo Prado, director do Salón; e Sala Afundación será a sede da mostra A banda deseñada galega nos vinte anos de Viñetas .