A Xunta falla os premios Xuventude Crea

O vindeiro 3 de decembro a Cidade da Cultura acollerá o acto de entrega do Certame Galego de Creadores Novos Xuventude Crea 2016. Será un acto multitudinario, xa que se conta coa participación dos 51 gañadores que levaron algún dos galardóns das 12 modalidades da convocatoria, que son teatro, artes plásticas, fotografía, música, relato breve, poesía, videocreación, graffiti, deseño de xoias, moda, cociña e banda deseñada. Cabaret Salomé de GN Teatro foi a vencedora no apartado de artes escénicas, mentres nas plásticas se impuxo Isabel Pazos Pose, coa obra pictórica John Nash. A nivel fotográfico, o xurado seleccinou dos gañadores, e Aitor Víctor Fernández Marcos, coa obra O aniversario e Fátima Seijo Martínez, con Cristálida comparten o galardón. Do mesmo xeito, na competición musical hai dous gañadores, Oîma cos temas Círculo da preguiza e Maraca, e Lucía da Fonte con Vida erradía e O absurdo.






A nivel literario, María Alonso Espasandín, coa obra A descoñecida gañou na competición de Relato Curto e Alba Cid Fernández, en poesía co traballo Mata mua (érase unha vez)dous mapas. En Videocreación, de novo dous gañadores, Andrés Horacio Bonader Robador, con A modesta trabada de Magritte a Galicia e Marina González Guerrero, coa obra O carrascal, mentres Daniel Mayobre López, e o seu graffiti Volver impúxose na competición dedicada a esta arte. O mellor deseño de xoias foi o da colección Prothesis collection de Emma Lichtenstein Fernández-Albor, en moda impúxose a colección From them de Beatriz Moreira Cotos, e no campo da cociña o vencedor foi Pedro Vázquez Pereira, coa receita Souto de mar.

No campo da banda deseñada impuxéronse os alumnos da escola O Garaxe Hermético, que fixeron triplete.Mirian Iglesias Pérez, coa obra O reloxo biolóxico da cidade, Inés Vázquez Ramallal, quedou segunda Sangoma e Daniel Corrada Rodríguez, levou o terceiro premio por Flor de fuego.

Os vencedores de cada categoría resultan galaradoados cun premio de 3.000 euros, mentres os que quedan en segundo posto levan 1.500 e quen fique en terceiro lugar obtén 1.000. O certame está orientado a "os mozos ou mozas galegos/as residentes en Galicia, non profesionais, con idades comprendidas entre os 16 e os 30 anos de idade cumpridos no ano 2016".