Xa se coñecen todas as propostas musicais que conforman o programa da terceira edición do festival urbano de cultura alternativa WOS. As derradeiras confirmacións reveladas esta semana son Vessel, Black Cobra, Tin Man, Pigs Pigs Pigs Pigs Pigs Pigs Pigs, ARIES, Pablo Electrocute, Nzumbe e Dj-Firmeza que se unen aos xa previamente confirmados Silver Apples, Thee Oh Sees, Roly Porter & MFO, Dead Meadow ou The Soft Moon. A presenza galega no evento que encherá de música espazos singulares de Compostela entre o 7 e o 11 de setembro estará representada por Triángulo de Amor Bizarro, Disco las Palmeras!, Fogbound o Malandrómeda vs LAR Legido.
WOS Festival defende unha visión ampla da cultura alternativa e de vangarda. Coa música como motor principal, pero con vocación multidisciplinar, o bloque principal do proxecto confórmano as actuacións musicais, pero tamén hai espazo e tempo apara outras manifestacións artísticas dos eidos audiovisual, gastronómico, artes escénicas, exposicións gráficas, etc, así como conferencias e mesas redondas. WOS Encontros contará nesta terceira edición con seis coloquios orientados tanto ao público en xeral como a profesionais da industria cultural. Na Cidade da Cultura e o CGAC terán lugar cinco coloquios: ‘Sold Out!: Novas estratexias tecnolóxicas aplicadas aos eventos culturais’; ‘Festivais 2.0: Creatividade e risco na xestión cultural’; ‘Novos medios, novas realidades: innovación audiovisual e o seu impacto na industria cultural; ‘Son & Visión: Unha historia do videoclip galego’; ‘Publica a lenda: mito e realidade da prensa musical independente’. Ademais destes espazos o WOS distribuirá a súa actividade por mprazmentos como o mercado de Abastos, a Fundación Granell, a sede da SGAE, o Teatro Principal e as distintas salas de concertos da cidade.
