Novás en imaxes

Escritor, tradutor de Hemingway, xornalista, correspondente de guerra e, como el memos se definía, "emigrante". A pouco coñecida historia de Lino Novás Calvo amosa un personaxe complexo e irrepetible. O Consello da Cultura Galega dedícalle unhas xornadas a este cubano nado en Grañas do Sor coa intención de dar a coñecer a súa memoria. En paralelo, tres vídeos permiten achegarse á súa figura dun xeito rápido e visual.

Ese lugar de donde me llaman é o título das xornadas que o Consello da Cultura Galega lle dedica hoxe e mañá á figura de Lino Novás Calvo. A actividade fai parte dun programa que busca dar a coñecer esta figura e que incluíu xa a dixitalización do seu legado. Himilce Novás, filla do escritor e xornalista, cedeulle ao Consello os fondos do seu pais, que xa foron dixitalizados e que se difundirán na rede. Como parte das iniciativas de difusión arredor desta figura, o web do CCG achega tres vídeos que permiten coñecer diferentes aspectos do traballo dun galego aínda pouco recoñecido.