Unha instrución de Educación adapta o Decreto do Plurilingüísmo

O secretario xeral de Política Lingüística, Valentín García, presentaba esta mañá a instrución coa que a Consellaría de Educación e Cultura quere adaptar o texto do Decreto para o Plurilingüísmo no Ensino ás sentenzas do Tribunal Superior de Xustiza. Segundo anuncia a Consellaría, a adaptación limítase a facer non vinculante a consulta aos pais sobre o idioma dos seus fillos. No entanto, seguirá a se realizar esta consulta, que deberá terse en conta polos centros á hora de establecer os seus usos lingüísticos. Ademais, teranse en conta factores como a realidade sociolingüística do contorno e presenza equilibrada de galego e castelán.