Cun ton algo máis adulto que no anterior volume, o Mundo de Basilius Hoffman volta ás librarías galegas da man de Urco Editora. Segundo adianta Fernando M. Cimadevila, autor do texto, Un faro na escuridade é un libro máis complexo. Se o anterior podía considerarse fantasía xuvenil, este pode dicirse que é fantasía a secas. Algúns dos misterios que o autor presentaba no primeiro volume desvélanse neste. É un pouco como un truco de maxia. Primeiro preséntase e logo desvélase o resultado. Entón hai algunhas cousas dos personaxes e da ambientación que se resolven nesta obra, pero claro que tamén hai novos misterios. Canda a Cimadevila, recunca Iván Valladares a ilustrar o proxecto, nun traballo que posúe unha grande importancia na obra ao lle dar forma a obxectos e personaxes que se atopan ao longo do texto.
As claves do éxito
Preguntado polas claves do éxito deste proxecto (aínda máis meritorio tendo en conta que o libro está dispoñible de balde no web oficial da serie) Cimadevila apunta que penso que funcionou polos personaxes, que caeron moi ben. Non hai un protagonista que resulte o favorito de todos. De feito fixemos unha enquisa e vese que a xente se identifica con catro ou cinco. Cada lector cóllelle cariño a un e iso fai que teñan interese por saber o que lles acontece. Canda a isto, unha orixinal ambientación pode ter tamén o seu gancho para atrapar lectores. Tentamos facer un tipo de ambientación moi xenérico. Non se sabe onde se sitúa a acción e hai nomes gregos, rusos, italianos ou franceses, isto pode descolocar e sae bastante da norma da literatura galega.
Proxectos e futuro
Aínda quedan tres volumes máis, segundo sinala o autor, para vermos o final da saga, ademais de proxectos en paralelo centrados nalgúns dos personaxes dos libros ou no pasado de Basilius Hoffman. Polo momento, non está claro qué será o próximo que vexamos. Agora toca promocionar este libro. Despois imos ver se sacamos primeiro o terceiro volume ou se tiramos por algunha desas pólas laterais. Canda a isto, o autor adianta que están a negociar as posibilidades de levar a outras linguas este mundo fantástico.
Encol das vendas que pode acadar o novo volume, Cimadevila recoñece que as espectativas son moi boas. Aínda que o primeiro vendeu mil, somos conscientes que o leu moita máis xente, porque moitos volumes foron para institutos e movéronse. Entón agardamos que este volume tire tamén deses lectores. Para alén do libro, os seguidores deste mundo disporán agora de mercadotecnia como camisetas e outros agasallos.
A vindeira cita para os seguidores deste mundo será no Culturgal. A Feira das Industrias Culturais acolle esta fin de semana unha presentación da obra e tanto o escritor como o ilustrador estarán presentes no posto de Urco Editora para asinar exemplares aos interesados.