Industrias Pesqueras é moito máis que o título dunha revista. É o reflexo dunha publicación especializada que foi motor e acicate do cambio social no sector pesqueiro dun país onde a pesca supoñía un importante montante de negocio. Motor e testemuña do cambio da pesca este ano cumpre 75 anos ininterrompidos.
Informou en Galicia dos motores diesel cando non existían a penas como mecanismo; descubriulles ós armadores españois unha especie de profundidade como era o fretan negro e ese espírito activo continúa hoxe promovendo a celebración en Vigo de catro edicións da Exposición Mundial da Pesca. “Industrias pesqueras” é moito máis que unha revista, é un motor impreso e dixital que cumpre este ano 75 anos en carteleira. Un período de tempo que a converte na revista especializada vicedecana da prensa especializada en toda Europa.
Navegar por todos os mares
Naceu en Vigo por ser unha das primeiras rexións pesqueiras do Estado Español e porque co paso do tempo o porto vigués se foi consolidando como sede e atraco das máis importantes flotas do litoral. Iniciativa da histórica Asociación General de Industrias Pesqueiras e as súas Derivadas, desde o seu primeiro número, o 15 de abril de 1927, foi marcando unha época e un estilo. De feito, foi quen desenvolveu en España o papel de dar a coñecer as novidades que se producían no sector a nivel internacional. Foi fundada por José Barreras Massó e comezou baixo a tutela de Miguel Rodríguez. O barco seguiría capitaneado por Francisco Fernández del Riego ó que seguiría Valentín Paz Andrade (que asinaba baixo do pseudónimo de “Mareiro” nos primeiros números da revista).
E “Industrias Pesqueras” apareceu cada quince días ininterrompidamente en épocas tan difíciles do momento histórico. Non faltou á súa cita cos problemas científicos e económicos derivados do mar nin na dictadura de Primo de Rivera, nin na segunda Guerra Mundial nin na dictadura franquista. E a día de hoxe conseguiu modernizarse ata tal punto que mesmo ten unha web desde a que se pode acceder a todos os seus contidos.
A revista foi unha tribuna xornalística do sector pesqueiro desde todos os puntos de vista. Desde as noticias e novidades económicas, industriais e mesmo de orde técnico, ó lado de novidades da ciencia oceanográfica e ictiolóxica, novos inventos e procedementos de pesca así como outras disciplinas afíns que están moi vencelladas á actividade pesqueira (transporte, conservación, construcción naval...)
Unha cultura vencellada co progreso
Ademais de ser foro e motor do cambio social dunha actividade industrial que supuña unha porcentaxe significativa dentro do sector productivo galego, “Industrias Pesqueras” soubo darlle ese toque entre científico e popular que non esquece nin distingue de disciplina nin de artes. Foi por ese motivo que un nutrido grupo de artistas e especialistas culturais, vencellados en parte coa relación que Valentín Paz Andrade tiña co mundo da arte e da cultura, colaboraron coa revista. Nos seus 75 anos de historia polas súas páxinas pasaron os traballos de Castelao, Federico Ribas, Carlos Maside, Guillermo Fontán... e tantos e tantos persoeiros que souberon darlle unha riqueza expresiva e plástica a unha revista xa de por si moderna e con personalidade.
Non é habitual que unha publicación especializada lle conceda tanta importancia ó mundo da cultura. En parte porque desde Fernández del Riego ata Valentín Paz Andrade, moi vencellados co mundo da cultura, souberon ver que a pesca desenvolvía outras formas de cultura. Unha expresión que se mantén mesmo ata día de hoxe, onde a revista se converte en obxecto de arte en si mesmo na exposición “Vigo, horizonte marítimo” que se exhibe no acabado de inaugurar “Museo do Mar”.
