Científicos, cociñeiros e agricultores colaboran na produción do chícharo bágoa galego

Un dos produtos da horta máis exclusivos e prestixiosos do mundo é o chícharo bágoa, unha variedade de orixe galega que ata o momento ningún produtor de Galicia se atrevera a cultivar, aínda que si se producía noutras partes da Península a partir de variedades galegas. Pero hai dous días presentouse o primeiro chícharo bágoa de Galicia, producido cunha curiosa simbiose entre vontade e investigación interdisciplinar.

Que agricultores, profesionais da restauración e científicos colaboren en común non é moi frecuente. E aínda menos que o seu esforzo se concentre en atopar a mellor variedade dunha curiosa pranta abundante en determinadas partes do litoral galego: o chícharo bágoa. Coñecido como o "caviar verde", é un produto de luxo que só se pode atopar nos grandes restaurantes do mundo, e cun prezo moi elevado debido á dificultade do seu cultivo e recolección. Ata agora, o chícharo bágoa producíase fóra de Galicia, por empresas foráneas, a partir de variedades orixinarias de Galicia, pero ningún agricultor galego iniciara o proceso de recuperación e explotación comercial deste produto. Santiago Pérez, de La Finca de los Cuervos, unha empresa de agricultura ecolóxica de Teo (A Coruña), reuniu á Misión Biolóxica de Galicia e a destacados cociñeiros do país para explorar as posibilidades deste produto.

Deste xeito, Javier Olleros, o mozo chef do restaurante grovense Culler de Pau, animou desde a banda gastronómica a produción do chícharo bágoa galego, e o profesor Antonio de Ron, desde o Consejo Superior de Investigaciones Científicas, colaborou coa empresa na selección de variedades coas que se debería experimentar para obter un método e unha selección viable comercialmente. Sementes procedentes de Esteiro (Muros) e outras localidades da costa galega constituíron a cerna do experimento. Tras moitos coidados, Santiago Pérez conseguiu a primeira colleita do chícharo bágoa de Galicia, nun proceso no que os cociñeiros exploraron os factores gustativos do produto.

La Finca de los Cuervos está a traballar, segundo Santiago Pérez, "na recuperación de numerosas variedades tradicionais galegas de diferentes especies", nos que este agricultor considera que hai un considerable potencial.